Shillong, August 10: Ka Deputy Commissioner jong ka East Khasi Hills District kala iathuh ba katkum ka kaiphot kaba la ai na ka Incident Commander, Zone-VII bad Medical Officer ba dei peit ia ka Mawlai UPHC ba ki don ki jaka trei ha Mawlai Nongkwar Blok-8 bad Blok-9 kila kyntait ban test na phang ha ka 9/8/2021.
Naka bynta ban khanglat ia ka jingsaphriang kane jingpang COVID-19 ha katei ka thain bad ka dong na ka liang u doctor ba dei peit ia katei ka jaka u la iohi ba don kam ban test na phang ban lah ban teh la kam ia kane ka jingpang ha kitei ki ar tylli ki blok.
Katba ki briew jong ka tnad ka koit ka khiah ki dang leit ban leh ia kane ka jingtest naphang kila don ki nongtrei kiba la ai daw ba namar ba kim don ia ki dak ki shin jong ka jingpang kila kyntait ban shah test bad kane ka jingkam jong ki kam don kano kano ka jingpynshisha na ki stad saian.
Kane ka jingleh ia ka jingtest na phang ka long ban iada na ka jingsaphriang kane ka jingpang lada jia ba ki don bad lah ban pynkurpang ia ki, kumta katkum ka bor kaba la pynkup hapoh jong ka Meghalaya Epidemic Diseases, COVID-19 Regulations, 2020 ryngkat ki jingpynkylla don kam ban leh ia kane ka jingtest nap hang.
Ka Deputy Commissioner kala pynmih ia ka jingpynbna ba namar ka jingbym treh jong ki kato katne ki dukan ban leh ia ka jingtest na phang ha Mawlai Nongkwar Blok-8 bad Blok-9 ki saw tylli ki dukan kin hap khang mardor haduh ban da pynbna da kumwei pat, ki saw tylli ki dukan ki dei jong u Bantei Basaiawmoit, Autoelectrical Wiring, Andrew, Tea Stall, S.B Swer Automobile Workshop bad D. Kharkongor Automobile Workshop.
