Shillong, Lber 20: Ha ka jingkynjoh ka seng ia u mawmer ba sawphew hynriew ka KSU lyngba ki artylli ki shnat treikam ki jong ka kata ka KSU Mawlai Circle bad ka KSU Shillong Mihngi Circle ki la synniang ha i bor barit sha ki paradoh parasnam ha kane ka sngi.
Ka KSU Mawlai Circle ha kane ka sngi ka la ioh ban aiti noh iaka iing ba la iarap shna hi daka Circle sha i Kong R.Jyrwa kaba la shna bad pynbit pynbiang ha ka shnong Mawlai Nongkwar ha kaba u Samla Donald V Thabah u la long kum kongsan ha kane ka sngi.
La don ryngkat ha kane ka sngi da i Kong Streamlet Kharbih iba dei i nongai sngewbha iaka jaka ban tei iakane ka iing ,i Bah M.Rumnong Rangbah Shnong ka Mawlai Nongkwar .
UBah Ezekiel Secretary shnong ka Shnong Mawlai Nongkwar,Samla Biangbor Paliar Vice President ka KSU Sengkmie uba long ruh u President ka KSU Mawlai Circle, Samla Eddie Malngiang Assitant General Secretary ka KSU Sengkmie bad kiwei kiwei.
Ha kane ka sngi ruh na ka liang ka KSU Shillong Mihngi Circle ka la synniang da ki laptop bad kor computer sha ka skul jong ka Dorbar Shnong Nongmensong hapoh ka jing ialam jong u Finance Secretary Samla Khrawbor Kharkongor bad Education Secretary Samla Jeremaiah Pohthmi ryngkat bad ki dhkot jong ka seng.
Ka jingsynniang ka long halor ka nongrim bad iarap iaki samla ba pule ha kane ka skul ban kynjoh sha ki kyrdan sha jrong ha ka juk ba mynta . Ka jingiarap lyngba kane ka jingnnoh synniang ka seng ka kyrmen skhem ba kan long kaba seisoh bad ba iarap shibun eh iaki khynnah skul jong kane ka skul. La pdiang iakine ki jingnoh synniang da i principal jong ka skul bad kiwei kiwei.
