Jowai, Iaiong 13: Ka jingjynjar sat jong u paidbah jong ka East Jaintia Hills District ha ka leit ka wan namar ka jingsniew palat jong ka NH 44, ka la pynlong biang ia ki 5 sengbhalang, kiba kynthup ia ka KSU-Jaintia Hills District Unit, ka AJYWO Sengkmie, ka HNYF-East Jaintia Zone, ka FKJGP Khliehriat Circle bad ka SRR-East Jaintia Hills lem bad ka jingkyrshan ba radbah jong u paidbah jong ka EJHD ban khot pynlong noh da ka pakhang shnong ba 24 kynta ha East Jaintia Hills District ka ban sdang naduh ka 5 baje mynstep jong ka 16 tarik u April bad kut noh ha ka 5 baje mynstep biang jong ka 17 tarik u April, 2014 ban pynbor biang ia ka sorkar ban pynbha ia baroh ki bynta ba la sniew jong ka NH-44 kata naduh Soomer, West Jaintia Hills haduh Malidor East Jaintia Hills.
“Ngi hap ban pynlong ia kane ka jingiakhih namar ba u paidbah jong ka EJHD bad ruh jong thain Shathei Lam-Mihngi hi jong ka ri India u la ia kynduh ia ka jingkthang ka bym lah shuh ban batai ha kine ki por ba mynta na ka daw jong ka jingiehbein jong ka sorkar jylla bad ka National Authority of India (NHAI) ia ka surok NH 44 kat haduh ba ym long shuh ban iaid kali mynta.” ong u bah M H Dkhar President jong ka AJYWO Sengkmie.
“Ka NH 44 ka dei u thied snam jong u paidbah jong ka Jaintia Hills bad jong ki jylla ba Shatei Lam-Mihngi jong ka ri India. Hynrei kane ka jingleh lyndet jong ka sorkar ia kane ka surok ka la kylla long pynban ka jingtim ia kitei baroh. Ka kordit bah bym lah ong, ka long ia ki bapli kiba pang ba shitom, kiba armet bad kiba duk ba rangli kiba shaniah ia ka jingim jong ki ha kane ka surok” Ong u Bah SS Niangti General Secretary jong ka KSU-JHDU.
“ U Bah M H Dkhar u la ong shuh shuh “Ar bnai shiteng mynshuwa, kata ha ka 24 tarik u January, 2014, ha kamra u Deputy Commissioner ka EJHD, ka NHAI ka la kular ia ngi ban maramot noh ia kane ka surok hynrei haduh mynta kam shym la leh ei ei satia. Wat ka Simplex Infrastructure Pvt Ltd kaba la dei ban sdang ban trei noh ia kane ka surok naduh ka 10 tarik, u January mynta u snem ruh kam shym pat la leh ei ei haduh mynta. Kane ka la pynbitar ia u paidbah shikatdei eh. Dei ka sorkar hi ka ba pynbor ia ngi ban ia khih, ym ma ngi.”
“Ha kane ka pakhang shnong (Bandh), yn shah tang ia ki kali kit nongpang bad ki kali jong ki nongthoh khubor ban iaid ha ki surok katba ia kiwei pat la kyrpad ia ki ba kin sngewbha ban sangeh noh ka iaid ka ieng ha surok khnang ba kin lait na kino kino ki jingjia ba sngewsih kiba lah ban jia da ka jinglah ban don jong ki nongshim kabu. Ngin ym bah khlieh ia kino kino ki jingjia kiba lah ban leh da ki nongshim kabu.” la ong u bah Niangti.
“Ngi kyrpad ia baroh ki paidbah, ki nongtrei sorkar, ki para sengbhalang, ki nongialam shnong jong ka EJHD ban iasnoh kti lang bad ngi ha kane ka pakhang shnong, kat kum ba ki la kular ban ai ia ka jingkyrshan kaba pura jong ki ia ngi ha ki jingiakhih jong ngi na ka bynta ka NH 44 ha ka jingialang paidbah kaba la long ha ka 5 tarik mynta u mynta u bnai ha ka nongbah Khliehriat. Ngi kyrpad ia ki paid bah ba kin sngewbha ban bat la ka kular. Kane ka jingiakhih jong ngi, kam dei na ka bynta ka jingmyntoi ba marwei jongno jong no hynrei ka dei naka bynta jong baroh lang” bynrap shuh shuh sa u Bah Niangti.(SP News)
