Jowai, Iaiong 27: Halor ka jingkuman jong ka sorkar ia ki mat jingdawa jong ki 5 seng, kiba kynthup ia ka SRS-EJH, AJYWO-CGB, KSU-JHDU, HNYF-EJZ bad ka FKJGP-KC, ban maramot noh ia ka surok bah NH-44 naduh Malidor haduh Soomer, kitei ki 5 seng lem bad u paidbah jong ka East Jaintia Hills District, mynta ka kynti, ki la nang pynjur shuh shuh ia ka jingiakhih jong ki da ka ba ki la khot pynlong syndon sa da ka jingpakhang shnong ba 48 kynta ha East Jaintia Hills District, ka ban sdang naduh ka ka 5 baje mynstep jong ka 30 tarik mynta u bnai bad ka ban kut noh haduh ka 5 baje mynstep jong ka 2 tarik u bnai ban wan.
“Mynta, lah 3 bnai kynthih ngi la pynlong ia ki jingiakhih halor ka jingkuman jong ka NHAI bad ka sorkar Meghalaya ban maramot noh ia ka NH 44 hynrei kane kam sei soh satia. Kumta ha kane ka kynti ngi hap ban pynjur shuh shuh ia kane ka jingiakhih jong ngi da kaba khot da kane ka jingpakhang shnong ba 48 kynta ban pynbor ia ka sorkar ban sngap ia kane ka mat jingdawa jong ngi,” ong ki nongialam jong ki 5 seng kiba kynthup ia ka SRS-EJH, AJYWO-CGB, KSU-JHDU, HYNF-EJZ bad ka FKJGP-KC.
Ki nongialam jong kitei ki 5 seng lem bad ki paidbah jong ka East Jaintia Hills, ki kyrpad jur ia ki nongialam shnong, ki para sengbhalang, ki paidbah baroh jong ka East Jaintia Hills bad ruh kumjuh ki kiwei pat ki paidbah baroh kynthup ia ki paidbah na kiwei pat ki jylla jong ka North East India ban iasnoh kti lang da kaba kyrshan pura biang ia kane ka jingpakhang shnong sa ha kane ka kynti ruh khnang ba kane ka jingiakhih kan long kaba jop kat haduh ba ka sorkar kan hap ban maramot noh ia kane ka surok kaba dei u thied snam bad ruh u budlum jong ki paidbah.
“Yn shah tang ia ki kali kit nongpang, ki kali ba don ha ka jingjia ba sngewsih kum ha ka iap ka sa bad ka kali jong ki nongthoh khubor ban iaid ha ki surok. Lait na kine, la kyrpad ia baroh ki kali bad ki paidbah ban iasnoh kti lang bad ruh ban kyrshan ia kane ka jingpakhang shnong khnang ban lait na ki jingjia ba sngewsih kiba lah ban shim da ki nongshim kabuh ha ki kynta jong kane ka pakhang shnong.” ong shuh shuh u kyrwoh na ki 5 seng.
“Ki san seng bad u paidbah jong ka East Jaintia Hills, ki la pynbna lypa ruh ba kin ym bah khlieh lada don kino kino ki jingshim kabu da ki riewbymman ha ki kynta jong kane ka jingpakhang shnong.
“Lada ka NHAI bad ka sorkar Meghalaya kam sngap ia ngi sa ha kane ka kynti ruh ma ngi lem bad u paidbah jong ka East Jaintia Hills, ngin sa nang pynjur shuh shuh ia ki jingiakhih jong ngi nangne sha khmat, pynkut u kyrwoh na ki 5 seng. Kane ka long katkum ka khubor kaba la pynlait na ki tei ki san tylli ki seng bhalang.(SP News)
