Shillong, Kyllalyngkot 25: U Bah Paul Lyngdoh MDC jong ka Jaiaw Konstitwensi mynta ka sngi u la plie paidbah ia ka CCTV hapoh ka shnong Quallapaty kiba la pynioh lyngba ka MDC skhim bad ia kane ka juh ka skhim yn ai ruh sha baroh ki shnong kiba hap hapoh jong ka Konstitwensi kiba don 12 tylli.
Haba kren ha ka jingialang kaba la long mynta ka sngi ha shnong Quallapaty u la ong ba kaba kongsan ka long ban pynlong ia ki briew ba kin shynrian ban leh ia ki kam sniew, lane ban khanglad ia ki jingsniew, shisien ba la lah ban khanglad ia ka jingsniew, kane kan iada na ki kam sniew.
U Bah Paul u la ong ba na ka jingkhein ka paw ba ka jingdon ki pulit ha kane ka jylla ka long kaba duna bha, dei hangne ba ka wan kata ka jingiatreilang hapdeng ki paidbah bad ki bor jong ka ain ban teh la kam ia ki jingsniew bad kyrmen ba da ka jingdon ia kine ki CCTV kan iarap ban iada na ki kam sniew.
Ha kane ka jingialang la ong ba ka shnong Quallapaty ka dei ka dorbar shnong kaba nyngkong ban ioh ia kine ki CCTV bad kiwei ki shnong ruh kiba hap hapoh jong ka Jaiaw MDC Konstitwensi kin sa ioh ia ki. Na ka liang jong u Bah Paul u la kynti ia ka dorbar shnong ba kin sumar ia kine ki tiar na ka bynta ka jingmyntoi jong ka shnong hi baroh kawei.
Ha ka jingkren jong u Bah Martamlin Pyrbot Rangbah shnong u la ong ba ka jingdon ia kine ki CCTV ka long ban wanrah ia ka jingshong suk shong shngian bad haba ki paidbah nongshong shnong kin iaid da ka jingsngew shngian.
Da ka jingdon ia kine ki CCTV kyrmen skhem ba kan iarap shibun ban iada na ki kam sniew namar ka shnong Quallapaty ka don ha jat jong ka Iewduh ha kaba ki riew haba ki lah ei ei ki mareh sha shnong bad kane ka pynbud nam ia ka shnong baroh kawei.
Na ka liang jong u Rangbah shnong u la pynpaw ia ka jingsngewnguh ia u MDC u ba la sngap ia kane ka jingkyrpad ka jong ki ban pynioh ia ki CCTV hapoh jong ka shnong ban iada na ki nongialeh kam sniew. Ha kane ka sngi la don lang ki nongkit kam shong ban ia sakhi lang ia ka jingplie ia ka CCTV kaba la buh 8 tylli ki Komera ha ki dong bapher bapher jong ka shnong.
