Shillong, Risaw 31: Ka seng samla pule jong ka KSU Tyrsad mynta ka sngi kala leit ban ai da ka dorkhas sha u Chief Engineer jong ka Distribution jong ka MeECL u Bah KN War halor ka jingjia ba sngewsih ha ka shnong Nongthymmai-Neng Lyngiong ha kaba bun ki mynsiem briew kila duh ei ia la ka jong ka jingim.
Ha kane ka jingiakynduh na ka liang jong ka seng kala buh phra tylli ki mat jingdawa ba ka MeECL ka dei ban leh, ban bujli thymmai noh ia baroh ki Transformers kiba la rim da kiba thymmai, ban thung kham bun ki Linesmen kum ki nongtrei bapura jong ka MeECL, ka MeECL ka dei ban da pynshisha ba ki Metter kiba don ha ki iing briew ba ki long kiba biang ban pyndon kam.
Ka KSU kala dawa ba ia ki transformers dei ban buh kham jngai na ki jaka ba don ki iing briew ban kham shyngian, ia ki jaka ba don ki transformers dei ban da ker bha da kaba thoh ruh ia ki signboard, ban pynthikna ba baroh ki transformers ki dei ban don ia ki “Cut Out” kiba biang, ka dei ruh ban don ka jingjurip kaba man ka por ia ki transformers bad ia ki meter.
Na ka liang jong ka seng ka dawa ba ka MeECL ka dei ban siew bai lutksan sha kato ka long iing kiba ki briew kila duh ei iala ka jong ka jingim, kaba la jia ha ka shnong Nongthymmai-Neng kaba hap hapoh jong ka Mawphlang Block jong ka East Khasi Hills District. Ka KSU kala ai por shitaiew b aka MeECL ka dei ban leh ei ei noh lem kumta kin pynlong da ka jingiakhih.
