Jowai, Naitung 06: Ka AJYWO sengkmie ha kane ka sngi Saitjain ba la lah ka la phah ia ka dorkhast jong ka sha u Myntri Rangbah Duh ba don burom jong ka Ri India, u Narendra Modi ban kyrpad ia u ban tuklar lem halor ka jingkhang tih bad khaii dewiong ba kynsan jong ka NGT ha ka jylla Meghalaya kaba la ktah jur haduh katta katta ia ki nongshongshnong jong ka Jaintia Hills khamtam kiba na ka thain East Jaintia Hills District.
“Ngim lah shuh ban peit shu peit isynei bad jaw tang ki ummat ia kito baroh kiba la shah ktah na ka hukum jong ka NGT. Katno ka long ka jingkordit bah ia ki ba im kyndoi ja kpoh da kaba bylla ha ki kam dewiong. Halor kane ka jingshem jingkordit jong ka jaidbynriew jong ngi na ka daw jong ka hukum jong ka NGT, ngi na ka liang jong ka seng, ngi la phah ia ka dorkhast sha u Myntri Rangbah duh jong ka Ri India, U Narendra Mod, ha kane ka sngi Saitjain ba la dep ban pyntip sha u halor ka jingeh kaba ki paid nongshongshnong jong ka ka Jaintia Hills ki la ia kynduh na katei ka hukum ba syndet jong ka NGT khlem da ai jingmaham (warning) lane ailad shuwa ia ki briew ban pyrkhat bad ruh wad lad wat lynti da kiwei pat ban im jakpoh hashwa ba kan khang syndon noh tdam ia ka jingtih bad khaii dewiong ha ka jylla Meghalaya” ong u Bah M H Dkhar President jong ka AJYWO Sengkmie.
Ka AJYWO ha ka dorkhast jong ka sha u Myntri Rangbah duh jong ka Ri India, ka la ong ba da phew ki phew hajar ngut ki trai shnong jong ka Jaintia Hills kiba im kyndoi jakpoh na ka ba trei bad bylla dewiong, mynta ki la ia sakma lut khlem kam khlem jam bad kaba sngewshyrkhei ka long ba shen ka jingiapkhlam kaba shyrkhei na ka daw jong ka jingshah thngan kan sa wan ban lynshop ha ki paid nongshongshnong jongka Jaintia Hills.
Ka AJYWO ka la kdew shuh shuh ha ka dorkhast jong ka sha u Prime Ministrer ba na ka daw jong ka jingkyrduh kam kyrduh jam jong ki nongshongshnong jong ka Jaintia Hills khamtam na East Jaintia Hills District na kane ka jingkhang tih bad khaii dewiong jong ka NGT, kane ka la kylla long kum ka jingtim kaba khraw ia ka thain ha kaba ka por mynta ka la jan poi ha kaba ki nongshongshnong jong ka thain, ban pyndap la ka jakpoh bad ruh ki jingdonkam bakyrkieh ha ing ha sem kum ha ka por ba pang ba shitom, kin sa leh bun jait ki kam pyntriem kiban sa ktah ia ka shongsuk shong sain ha ka thain.
Ka AJYWO ka la ong ruh ha ka dorkhast jong ka ba kane ka ka jingkhang tih bad khaii dewiong ba syndet jong ka NGT ha ka jylla, kan sa long ruh kum ka jingpynbor ia ki khun samla jong ka thain ban jied ia ki lynti bymman ha ka jingim jong ki da kaba rung sha ki kam ’Kai khlaw namar ka jingbym banse ka thom ia ka sang namar kine ki ba la shah ktah na katei ka hukum jongka NGT ki la sdang bynniaw ia la ka jong ka jakpoh bad ka ing ka sem bad ia la ka lawei da kaba ba byrngem ban rung sha ki kam kai khlaw.
“Lyngba kane ka dorkhast jong ngi sha u Myntri Rangbah Duh, jong ka Ri India, ngi la kyrpad jur ia u ban pyrkhat sngewsynei lem ia kito baroh ki paidbah nongshnongshnong jong ka Jaintia Hills bad ruh jong ka jylla hi barohkawei ki ba la shah ktah jur na kane ka hokum jong ka NGT da kaba tuklar ia katei ka hukum bad ruh da kaba thaw ia ki lad ki lynti ban pynlait noh ia ka jylla bad ka thain Jaintia Hills na kane ka hukum jong ka NGT”. La bynrap shuh shuh u Bah M H Dkhar.
Ka AJYWO ka la kyrpad ruh ia u Myntri Rangbah Duh jong ka Ri ban weng noh ia ka NGT na ka jylla Meghalaya namar ka jylla Meghalaya ka hap ha ki Sheduled Areas hapoh ka jingpeit jong ka Sixth Scheduled jong ka Riti Synshar ka Ri India ha ka ba ki briew ki ba shong ba sah ha kane ka jylla ki dei ki riewlum ba rit paid, kiba dang sah dien haduh katta katta habaroh ki liang bad ruh ba ka rukom bat khyndew bad shyiap ka iapher bak-ly-bak na kiwei pat ki bynta jong ka Ri India, kiba dang don kam ia shibun ki jingiarap na ka sorkar kmie na ka bynta ka roi ka par ha baroh ki liang.(SP News)
