Jowai, Iaiong 14: Ka Jaintia Student Union (JSU) bad ka Jaintia Youth Federation (JYF) hapoh ka jingialam jong u bah P L Majaw President jong ka JYF sengkmie bad u samla Emperor Bareh general secretary jong ka JSU sengkmie, ki la leit ban ia kynduh ia u CEM ka JHADC u Ma Thombor Shiwat mynta ka sngi kila leit ban ia kynduh ia u CEM jong ka JHADC ha kaba kila dawa ban dawa pyndam beit mardor ia ki briew ba la dep thungkam sop sop da u Ex CEM u Ma Madonbai Rymbai, khlem da ai ka jingpynbna (Advertisement) paitbah ha ki lad pathai khubor kaba long ka jingtip kaba shai ia ki khun samla ka Ri lum Jaintia ba kin ioh ban ia thep lang katkum ki kyrdan bapher bapher ba ki lah pyndep na ka jingpule jong ki, kumba la pynnang pynstad ia ki da ki kmie ki kpa kiba la pynlut ia ka bor bad ka umsyep na ka bynta ki khun jong ki ba kin ioh jingnang stad bad iohkam ioh jam khnang ba kan shngain ka lawei jong ki.
Ha kane ka jingia kynduh jong ki ar Seng ia u CEM ka JHADC ba la synran lang ia u da ki 8 ngut ki EM kiba la pynpaw ia ka jinglong ba la kloi jong ki ban shimkhia halor kane ka kynrum kynram kaba lamih hapoh JHADC, da ka ba kular ba kin leh ia kaba donkam katkum ki kyndon thungkam thungjam jong ka Council khnang ba ki khun samla jong ka Ri lum Jaintia baroh kawei kin ia ioh ban ia thep kyrteng lang katkum ki kyrdan bapher bapher jong ki, kular u CEM JHADC u Ma Thombor Shiwat hakhmat ki nongialam jong ki Sengbhalang.
Kumjuh na ka liang jong u bah Majaw President jong ka JYF Sengkmie uba la ialam khmat hangne u la ong ba ka jingthungkam hapoh Council ha kine ki bnai ba lah dep da u Ex CEM ka JHADC u Ma Madonbai Rymbai ka la long shabar ki kyndon thungkam jong ka Council kaba la ktah bad pynbitar jur ia baroh ki khun samla jong ka RI lum Jaintia kiba la shu shong ha ing khlem kam khlem jam namar ba kim ioh jingtip ba tikna ia ka jingdon ki post ba thylli hapoh ka JHADC.
Shuh shuh ha ka ne ka jingiakren na ka liang u CEM ka JHADC u la pynsngew ba ym da donkam than ban thung post thymmai ha JHADC namar tang ka jaka shong ruh ym don shuh te ha ei ngin pynshong ia ki nongtrei haba la khap ngiah palat ka Council bad khamtam ki dei kiba la shu thung shabar jong ka budget provision jong ka Council ong u Ma Thombor Shiwat CEM ka JHADC.
Kumta na ka liang jong ki Ar Seng ki kyntu ia u CEM ka JHADC ba un leh ia ka ba donkam da kaba pyni syndon da ki kam ym tang ka ktien, hynrei ka kam ka kren khamjam ban ia ka ktien pynkut u kyrwoh na ki ar seng.(SP News)
