Shillong, Naitung 30: Ka seng LYWA kwah ban pynshai hangne ba tang ka NOC na ka kur sangriang ka long ka ba beain namar dei tang ika jingleh donbor, thombor, ka jing ibein, niewbein bad ka jing iuhroit jong ka UCIL bad AMD iaka riti dustur jong u Khasi. Katkum ka riti dustur pyniaid shnong pyniaid hima jong u Khasi ka NOC na u Rangbah shnong ka dei ban wanrah ha poh ka executive dorbar jong u Syiem bad sa haka KHADC ban bishar bniah bin pa bin ia ka lait ka let ka wit ka wa.
Te khnang ban nymsah ha ka umdum bad ka jing artatien jong ki khun ka Bri u hynniewtrep ka UCIL BAD KA AMD DEI BAN PYNSHAI PAIDBAH mano bad mynno la ai NOC (1) u Rangbah Shnong (2) U Syiem Hima Langrin (3) KHADC (4) bad balei ka UCIL ka phah ia ki nongtrei ban pyn klumar shnong ha Mawthabah bad Wahkaji?
Ka pyni shai ba ki nongtrei jong ka UCIL bad AMD ki dei ki nong pynklumar shnong. Ki bor jong ka ain ki dei ban kem bad pynshitom mardor ia kitei ki nongleh kam be ain. Ka sorkar ha ka jaka ban thwet ia ki khun samla jong katei ka thain dei ban thwet bad kem shisyndon ia kitei ki officer jong ka UCIL kiba wan trei bad rung be ain ha katei ka thain.
Kyntang ia wai ka Langrin Youth Welfare Association (LYWA )ka pynrem jur ia ka jing leh riew khlaw bad ka jing bym khein snep jong ka UCIL iaka riti dustur jong ngi. khlem don shuh ka rain ka rem da kaba khein dew thala ia ki nongshong shnong bad iaka im lang sah lang. La ong u Bah B S Lyngdoh president ka LYWA ha ka kyrwoh.
