Shillong, Naitung 11: Ka South West Khasi Hills District kala rahe ia ka “World Population Stabilization” kaban long ar tiew lynter ha Mawkyrwat ha kaba u Deputy Chief Minister u bah Rowell Lyngdoh u la long u kongsan hakane ka sngi, ia kane ka jingialang la pynlong da ka ophis jong ka District Medical & Health Officer, South West Khasi Hills District, Mawkyrwat.
Ha ka jingkren jong u Bah Lyngdoh u la ong ba ka Ri India mynta ka long ka ri kaba wan ba ar ha ka jingbun paid ha kane ka sla pyrthei bad lada yn lah ban iada ha ki snem ban wan kan sa tam palat ban ia ka Ri China, u la ong ba ka jylla Meghalaya mynta ka don 32 lak ngut ki paidbah nongshong shnong.
U Bah Lyngdoh u la kyntu ba dei ban shim ia ki lat li lynti kumno ban iada ia kane ka jingkiew ha ka jingbun briew namar ka ktah ia ka koit ka khiah bad u la ong ba ki long iing long sem ki dei ban da sngewthuh ban kiar na ka jingduk bad u la ai jingmut ia ki paidbah ba ki dei ban pan jingmut na ki doctor kumno ban ialeh ban pynduna iaka rukom ioh khun.
U la ong ba ki kmie ki kpa ki dei ban hikai ia ki khun ba kumno ban pynduna khun ban kiar na ki jingeh kiba mih ha dien ka bud.
Ia kane ka jingialang la pyniaid da ka Deputy Commissioner, ka kong Ripnar Lyngdoh, ka Dr M Marbania ka District Medical & Health Officer, South West Khasi Hills District, Dr.W.Narry, Medical & Health Officer, Mawkyrwat CHC bad Dr. F. R. Lartang, Sub Divisional Medical & health Officer, Mawkyrwat CHC.
