Shillong, Lber 07: Ka BJP Youth Wing Meghalaya ka ai jingkyrshan ia ka jingdawa jong ki khlieh nongsynshar Sohra ban thung kynhun tohkit ia ka jingthut Treikam ka MCCL haduh u pud wat tang ka packet thep cement ruh kam don.
Kane ka pyni ia ka jingbym khein snep ka sorkar ia ka bha ka miat ki paidbah ka thain Sohra bad ia ka jylla. T.135 Crores ka sorkar ka dang shu dep pynlut ha ka Dry Process Project, nalor kata 85 crores ruh dang shu dep ai ia ka MCCL na ka bynta ki jingdonkam ban siew ia ka Bill sha ki supplier bad Contractor bad kiwei kiwei ki jingdonkam kynthup ia ka jingsiew tulop ia ki nongtrei.
Hynrei kaba lyngnoh ka long haduh mynta ka MCCl bad ka sorkar kam pat lah ban siew dep ia ka tulop ki nongtrei jong u snem 2015, kumjuh ia ka arrear bad ka rukom Treikam ka karkhana kam iaid beit ka thut lut, shano ka pisa ka jah bad shano la pynlut.
Kumta ka sorkar ka dei ban thung da ki CBI inquiry ba ka hok jong u paidbah kam dei ban shu sepei kai, la ong u Bah Egenstar Kurkalang, President BJYM, Meghalaya
