Shillong, Lber 23: U myntri ba dei peit ia ki kam bording jong ka jylla u Bah Sngewbhalang Dhar haba jubab ia ka jingkylli jong ka Dikkanchi D Shira, u la iathuh ba ka jingduh jong ki transformer ha u snem 2013-2014 ki long 415 tylli, ha u snem 2014-2015 ki long 428 tylli, ha u snem 2015-2016 ki long 492 tylli bad ha u snem 2-16-2017 haduh u bnai Rymphang ki long 524.
Ka daw bah jong ka jingduh jong ki transformer ka dei na ka jingpyndon jong ki briew ha ki nongpyndong ban shet jingshet da ka light, ka jingpom ka leilieh bad ka jingring light tuh jong briew sha ki nongkyndong bad bun kiwei kiwei de kid aw hynrei kitei ki long kiba ha khmat eh kaba la pynlong ia ka jingduh jong ki transformer.
Naka liang jong ka Dikkanchi kala buh ia ka jingkylli bynrap hato ka dei ka jingshisha ne em ba ki briew jong ka MeECL ki phah siew ha ki nongshong shnong ia kabai shna jong ki transformer, na ka liang jongu myntri u la ong ba kam don kaba kum kata, kaei kaba ka MeECL ka leh ka long ba ka kyntu ia ki briew ba kin siew noh ia ka bai laight kaba dang sah.
Halor ka jingkylli bynrap jong kiwei de ki dkhot jong ka iing dorbar haba ia dei bad ki transformer, u myntri u la ong ba ia mynta ka MeECL ka don lai tylli ki jaka maramot ia ki transformer , kawei ha Umiam, kawei ha Dakopgre bad ha Mendipathar bad lada bun eh ki transformer ka MeECL ka phah ruh sha ki jaka shna jong ki riew shimet.
Haba ia dei bad ka jingthied ia ki transformer, u myntri u la ong ba ki don ki komepni kiba la ithuh da ka MeECL ban thied ia ki, lada u transformer u duh tang khyndiat ki shna ia u bad phah biang da u juh bad lada la bun ka jingduh ki thied da u ba thymmai.
U Bah Witting Mawsor, u la ong hapoh jong ka iing ba ka Maweit PHC kam don light mynta la hynniewbnai, la kyntu ia u myntri ba u dei ban peit kyrpang ia kane ka kam bad na ka liang jong u myntri u la ong ba ka sorkar kan sa peit ia kane. U myntri u la iathuh hapoh ka iing dorbar ba ia mynta ki dang sah sa 250 tylli ki shnong kiba ka MeECL kam pat lah ban pynpoi ia ki transformer.
