Shillong, Lber 07: Mynta ka sngi na ka liang jong ka MeECL kala phah ia ki briew jong ka ban leit ban ot ia ka bor ding elektrik kiba la suba ba kila ring beain kiba shong ba sah ha Maxweltone Estate kaba don ha Laban, haduh ba thoh ia kane ka khubor ym pat tip katno tylli ki iing kiba la shah ot.
Ka KSU Laban ha ka sngi Palei kala leit ban buh ia ka jingujor sha u shongknor jong ka MeECL ha kaba kala kynnoh ba ki don kiba shah ha katei ka jaka kila ring light beain, dei halor kane ka drokhas mynta ka sngi ka liang jong ka MeECL kala phah ia ki briew jong ha katei ka jaka ban ot ia kiba la kynnoh ring beain.
Ha katei ka jingiakynduh ha ka sngi Palaei ka Seng ha kane ka dorkhas ka la pynpaw ba kine ki briew kiba sah ha Maxwelton Estate kila ioh ia ka light bording da kaba leh tuh ne shu shim connection lang bad ki briew kiba iadon meter light.
Na ka liang ka Seng ka pynpaw ruh ia ka jinglynngoh ba kumno kine ki briew ki ioh ban ring lait haba kim shim don kino kino ki kot ki sla kiba biang, bad wat ka Dorbar Shnong ruh kam shim la Ithuh ne ai kot ia ki. Ki riew paidbah shuwa ban ioh light ha iing ka jong ki, ki hap ban pynshisha ia ka jinglong trai ka jong ki ia ka khyndew ne ka iing kaba ki sah.
Hynrei kaba lyngngoh ka long ba baroh kine ki briew ba sah beaiñ ha kane ka jaka ki ioh ban ring light bad kumno na ka liang ki bor pyniaid kim shim la jurip bad ki shu sngap jar baroh shi katta. Kane ka jingleh jong ka MeECL lehse ka lah ban long kawei na ki dawbah ba ka tnad ka don hapdeng ka jingkyrduh pisa.
Ka Seng kala ban jur ba dei ban phah ia ki bor pyniaid ba ki dei ban hiar mardor sha katei ka jaka ban khmih hi da lade ia kine ki kam tuh bad ba dei ban ot light mardor ia kiba tuh light bad pynshitom ia ki katkum ka aiñ.Ka Seng kala dawa ruh ba ka MeECL kadei ban jubab da ka jingthoh sha ka Seng halor ka jingioh light kine ki briew kiba sah beaiñ ha kane ka jaka.
