Shillong, Naiwieng 25: Ki nongshong die madan ha saw dong jong ka Iewduh mynta ka sngi ki lait ban pan ia ka jingiarap na ka KHasi Hills Autonomous District Council (KHADC) ha kaba ki la lah ban ia kynduh ia u Bah Antonio War Executive Member halor kane ka jingshah kyndang ka jong ki ha ki bor jong ka ain.
U Bah Neil Antonio War ha kane ka jingiakynduh u la pynsngewthuh ia ki ba kane ka jingkyndang ia ki ka dei ka hukum jong ka iing bihsar ba don burom jong ka Meghalaya High Court, kawei pat ka long ba dei u Syiem jong ka Hima Mylliem u ba shim ia ka musur na kine ki nongdie madan.
Haba ka ophis jong u Syiem jong ka Hima Mylliem kala shim ia ka musur na ki nongshong iew ka dei ka kamram jong ka hima kan ai ka jingiada ia ki nongshong die madan. Haba ia dei bad kane ban wad ki lad ki lynti ha kaba ia dei bad ki jingeh jong ki nongshong madan ka KHADC kala buh ba kin ia kynduh ha ka 29 tarik mynta u bnai.
Kane ka jingiakynduh kan long ha pdeng ka KHADC , u Syiem jong ka Hima Mylliem bad ki nongshong die madan ban ia peit ia kaei kaba ki lah ban leh ha kaba ia dei bad kane ka kam kaba kum ki nongdie madan ki ia kynduh jingeh.
