Shillong, Jymmang 17: Ka jingialang ba kyrpang jong baroh ki nonghikai SSA bad nonghikai ba saw (4th Teachers) kiba hap hapoh u pud u sam ka West Khasi Hills District hapoh ka lama jong ka Meghalaya SSA Schools Association (MSSASA) West Khasi District Unit kan long ha ka 20 tarik mynta u bnai ha ka por 11 baje mynstep hapoh Bishop Conference Hall Nongstion.
Katkum ka kyrwoh ba la phah da u bah H.M.Marbaniang General Secretary ka Meghalaya SSA Schools Association (MSSASA) Sengkmie la pyntip ba ha katei ka sngi yn sa pynshai bad iakren halor ka kaiphot ba la iohpdiang da ka synjuk na ki ophisar ka tnad Sarva Shiksha Abhiyan State Education Mission Authority of Meghalaya ( SSA- SEMAM) bad Director ka DSEL ha kine ki sngi ba la dep.
Kane ka kaiphot kadei halor ki jingdawa jong ka synjuk kiba kynthup, ka jingpyllait ia ka tulop thymmai bad arrear jong ka snem mang tyngka (Financial year) 2016 – 17 ba la dep mynjur da ka Project Approval Board (PAB) 2016 bad katkum ka hukum ba la pynmih da u State Mission Director (SMD) ka State Education Mission Authority Meghalaya (SEMAM) ha ka 31 tarik u Risaw jong u snem ba la dep ka ban treikam naduh ka 1 tarik u Iaiong 2016.
Ka jingpynkiew tulop ia ki nonghikai 4th Teachers, ka result Diploma in Elementary Education (D.El.Ed) bad ban phah training D.El.Ed ia ki nonghikai SSA bad 4th teachers kiba dang sah ba hap ban pyndep ia katei ka professional course katkum ki kyndon ka National Council of Teachers Education (NCTE), bad ka jingdawa ban pynjynsur ia ka jingsiew jong ki nonghikai SSA ki bym pat pyntbit (untrained teachers) katkum ki kyndon ka NCTE bad RTE Act, 2009 na ka bynta ka snem mang tyngka (Financial year) 2017 – 18 bad kiwei kiwei ki mat jingdawa kiba iadei bad ki nonghikai SSA bad 4th teachers.
Ha katei ka sngi ki nongialam ka MSSASA Sengkmie bad ki nongkitkam ka MSSASA – West Khasi Hills District Unit kin iadonlang. Kumta ka synjuk ka khot ka wer ia baroh ki nonghikai SSA bad 4th teachers kiba hap hapoh u pud u sam jong ka West Khasi Hills bad ban wan khnang khnang ha katei ka sngi ban ioh ia ka jingpynshai kaba bniah.
