New Delhi Naiwieng 18: Ki nongialam jong ka Meghalaya SSA Schools Association Central Body (MSSASA- CB) hapoh ka jingialam jong u President bah Aristotle C. Rymbai bad u General Secretary bah H.M. Marbaniang ki la ia kynduh ia u Myntri ka MHRD u Prakash Javadekar ha kane ka 18 tarik mynta u bnai ha New Delhi.
Ka jingiakynduh ka long kaba seisoh ha ryngkat ka jingiasynran lang jong ki arngut ki MP jong ka jylla u Ma Vincent H Pala jong ka Shillong parliamentary constituency bad u Conrad K Sangma u President jong ka NPP uba dei ruh u MP jong ka Tura Parliamentary Constituency ha ryngkat ka jingiadonlang u bah Daniel Stone Lyngdoh Legal Adviser ka MSSASA- CB ,ka jingiakynduh ka dei halor ki 7 tylli ki mat ba kongsan ba la buh ka jingkyrpad sha ka Ministry jong ka MHRD ba kan khmih bad buddien ia ki jingeh ba ki nonghikai SSA hapoh ka Jylla Meghalaya ki iakynduh.
Ki hynniew tyllii ki mat ba la buh hakhmat jong u Myntri ka MHRD ki long kine harum, kawei ka jingleit shah pyntbit kyrpang ha ka kam hikai na ka bynta ar snem hapoh jong ka D.EL.ED, Ka jingpyniapher ha kaba siew ia ka tulop sha ki nonghikai kiba dei jong ka SSA, kila ia kren ban pynkiew ia ka tulop jong ki nonghikai SSA.
Dei ban pynrung noh ia ki nonghikai na ka SSA na ka ki skul primary bad upper primary na ka SSA jingpyniaid jong ka jylla kaba la tip kum ka “ State Implementation society” SSA-SEMAM sha ka tand pule puthi jong ka sorkar jylla ban ithuh noh ia ki kum ki nonghikai ba pura jong ka sorkar.
La ia kren ruh ka jingdon jong ki nonghikai bad ka jingdon jong ki khynnah skul, ka jingdon kam ia ki iing ban tei, ban pynthymmai ia ka rukom hikai ia ki khynnah skul bad ia ki skul upper primary jong ka SSA dei ban kyntiew sha ka Secondary.Ha ka jingiakren u Myntri u la kular ban shimkhia bad ban buddien ia kitei ki jingeh kiba ki nonghikai SSA ki iakynduh bad ruh ban pynioh ia ka hok kiba ki nonghikai SSA kidei ban ioh.
