Shillong, Lber 12: Mynta ka sngi ka seng HANM kala leit ban bret ia ki mawpud ha khmat ka Secretariat bad ha KHADC bad ban kylli ba kumno ka sorkar Assam katba ka dang don ha pdeng ka jingiakren pynbeit pud kala da wan sih da ki mawpud ha Ri Bhoi District.
U Bah Lamphrang Kharbani President ka seng haba kren ha ki lat pathai khubor ha dien ba la leit ban bret ia ki mawpud bala leit ban phut da ka seng la dawa ba ka sorkar Meghalaya ka dei ban pynshai ba kumno ka Assam kala nud ban wan sih ia kine ki mawpud.
Na ka liang jong ka seng HANM ka dawa ba ka sorkar ka dei ban pynshai namar kane ka jingiakren pynbeit pud ka dang don ha ka tnad kam poh iing ka sorkar pdeng, kumno kala da wan sih pud, ka long ba ka sorkar Assam ka ia kren shiliang ka tynrah pat da shiliang.
Haba ia dei bad ka District Council u President ka seng HANM u la ong ba lada kim lah ban iada ia pud u sam kumba ki kam ba dei nongker nongba ia pud u sam la dei ban pyndam noh lada kim lah ka seng kan nym ialad ban ia lehkai bad ka kam pud kam sam jong ka jaidbynriew.
La dawa ba ka KHADC ka dei ban khot hajir mardor ia u Syiem jong ka Hima Jirang bad ba u dei ban pynshai ba balei kane ka jingwan thung pud ka Assam, kat ba ka Boundary Committee ka dang ia pynbeit pud ymd ei ban thung pud, kane ka jingleh jong ka sorkar Assam ka long ba ka tynrah na die katba ka jingiakren ka dang iaid.
Ha kane ka jingleit bret ia ki mawpud ba la phut da ka seng ha khmat Secretariat bad KHADC la don bad synranlang ruh da ki dkhot jong ka seng bad ka jingdawa ka long ba ka sorkar ka dei ban pynshai kumno ka sorkar Assam ka wan thung pud.
