Shillong, Lber 05: Ka tnad pulit jongka sorkar Jylla shen kan sa pynbna ban khot aplikoshon na ka bynta 3100 tylli ki kam kiba lait hapoh jong ka tnad hadien ba la dep ban pynbit pynbiang ia baroh ki jingdonkam kat kum ki kyndon.
Haba kren ha ki lat pathai khubor u Inspector General ki Police u bah Francis J Kharshiing u la ong ba kine ki 3100 tylli ki kam ki ban sa lait ha ka tnad pulit ia ka ban ynsa sdang ban khot ia ki aplikoshon na duh ka 1 tarik u bnai Iaiong 2024.
Ki kam kiba lait ia kaba yn sa pynbna kin kynthup ia ki 76 tylli ki kam ha ka tnad arm branch ha ka kyrdan Sub Inspector, ki don 1255 tylli ki kam hapoh ka tnad unarm branch bad 1637 tylli ki kam arm branch ha ka kyrdan langrut.
U bah Francies Kharshiing u la ong ruh ba ha kane ka kynti ba mynta na ka liang ka tnad pulit kan but beit kat kum ki kyndon jong ka Sorkar ha ka ban ai jingtip sha ki paidbah.
U la ong ruh ba haduh mynta ki don ha duh 5 tylli ki center ha ka jylla kawei ka First MLP Battalion ka ba don ha Mawiong ka ba lah ban ai ka jingshakri na ka bynta ka East Khasi Hills, ka wei pat ka second MLP battalion ka ban ai jingshakri sha ki paidbah ka west Garo hills, ka third MLP Battalion sahbsein ka ba ai jing shakri ia ki paidbah jong ka Jaintia Hills.
Ka fourth MLP Battalion ka ba ha Sohpian ka ban ai jingshakri ia ki paid bah jong ka West Khasi Hills bad ka Fifth MLP Battalion ka ba ha williamnagar ka ban ai jing shakri sha ki paidbah ka east bad south Garo hills.
U bah Kharshiing u la ong ruh ba ha kane ka kynti ba mynta na ka liang ka tnad Pulit kan pyntikana ba kane ka jingpynrung kam kan long da ka lynti ka ba khuid bad kan ymdon kano kano ka jingleh thok ha ka eksam.
Na ka liang u DGP ka Jylla U Dr LR Bishnoi u la ong ba ha kane ka jingpynrung kam na ka liang ka tnad pulit kan pyndait da ki kor CCTV camera khnang ba kane ka jingpynrung kam kan long ka ba khuid bad suba.
U la ong ruh ba na ka liang ka tnad kan pyni da ki marksheet sha baroh ki nong apply ia kam pulit khnang ba kin ioh ban tip la ki long ki ba bit ne em ban ioh rung.
U la ban ruh ba ha kane ka jingpynrung kam ka ba mynta kan pyntrei kam da ka khuid kaba suba khnang ba kan don ka jingkhuid ha ka rukom pynrung kam.
