Shillong, Iaiong 04: U General Secretary ka Khasi Students Union (KSU) samla Donald V. Thabah mynta ka sngi ka 4 tarik u Iaiong 2024 i u la kyntu ia ka sorkar ba kan ym pynjynjar bad pyntyrha shuh ia ki dkhot jong ka seng, hynrei lym kumta ka seng kam banse ban shim da kiwei pat ki sienjam kaba lah ban ktah ia ka shongsuk shongsain bad kaba lah ban ktah pat ia ki bor sorkar.
Une u nongialam ka KSU u la pynpaw ia kane halor ka jingkem jong ki Pulit ia ki arngut ki dkhot jong ka Khasi Students Union, South Khasi Hills District Unit na ka shnong WahuTim bad na ka Shnong Saitsohpen dang ha kine ki khyndiat sngi halor ka jingshah pyniap jong ki arngut ki bar jylla ha ka shnong Ichamati ia kaba la jia ha ka 27 tarik u Lber2024.
Ha ba kren halor ka jingphah dorkhas jong ka Vishwa Hindu Parishad (VHP) sha ka President ka Ri India ka Droupadi Murmu ban tuklar halor ka jingshah pyniap jong ki arngut ki bar jylla ha Ichamati bad kumjuh ruh ia ka jingdawa jong ka Coordination and Welfare Committee (CWC) Shella Bholaganj Block ia ka Sorkar ban kem mardor ia kiba donkti bad ka jingpynbna jong ka Meghalaya Linguistic Minority Forum (MLMF) ban pynlong ia ka jingiakhih shong kyllain myngngor ha Khyndai Lad.
Na ka liang jong une u nongialam jong ka KSU u la ong ba seng kan ym shong kli kti namarba lada ma ki, ki iakhih ia ka jingshah banbein jong ki parajait ki jong ki, ka KSU ruh kan hap ban mih ban iada ia ka jingshah banbein jong ki paradoh ki parasnam la jong.
U bah Thabah u la phah ruh ka kyrwoh sha ka VHP ha ka jingrakhe ia ka Sngi Kyrsiew Ri Khasi National Awakening Day, u General Secretary ka KSU u la ong, “ngi, ngim ju tuklar ia ka kam jong ka VHP sha dewbah India, ka VHP ruh kam dei ban wan tuklar ia ki kam ki jam hapoh ka Bri u Hynñiewtrep. Ka VHP kam dei ka seng kaba long seng trai ri hapoh kane ka ri Khasi, ka dei ka Foreign Agency, ka Foreign Organsation bad kam dei ban tuklar eiei ha kaba iadei bad ka jinglong jingman ha kane ka Bri u Hynñiewtrep.”
U bah Thabah u la kynthoh ruh ba, Sa kawei ka kyrwoh ia ka VHP halor ka jingong ba ka peit ia baroh ki nongshong shnong India, hynrei kaba sngew phylla ka long ba ka VHP ka peit pynban ia kita ki mynder poiwir kiba wan buhai shnong kiba ioh ia ki kot ki sla lyngba ki kam buit tuh bad kam peit ia ngi ki trai ri trai muluk jong kane ka jaka. Kane ka pyni ia ka jinglong arsap jong ka VHP.
U bah Thabah u la phah ruh ka khubor ia ka VHP, ba lada ki sngew ba ki don ia ka jingkitkhlieh ia ka jinglong jingman hangne hapoh ka jylla jong ngi, tehlakam shwa ia ki dkhot jong ki, kiba don hangne hapoh Shillong, kiba iaid rally mynshem snem hapoh Laban ha ka sngi u Blei kiba ieng hakhmat ka khyrdop jong ka Ingmane Grace Covenant Church.
Ha Laban Presbyterian Church kiba hylla Jai Shri Ram, kiba hylla ia ki kyntien shitniam ban byrngem byrsit ia ki paradoh parasnam jong ngi kiba dang shong jingiaseng. Lada kam leh kumta, ka mut ba kane ka seng ka shu long tang na ka bynta ka jingmyntoi jongno re jongno. Ka KSU kam tieng kam smiej bad kan ym ailad hi ruh ia kine ban wan pynduh mynsiem, ban thombor ia ki paradoh parasnam ki jong ngi.
