Shillong, Nailur 30: U myntri rangbah ka jylla u Dr Mukul Sangma, u la ong ba ka sorkar ka la dep ban buh ia ki iing bishar kiba kyrpang ban bishar ia ki kam leh beijot ia ki kynthei khynnah bad kum kane ka long mynta bun na kine ki kam runar ki shah mudui haki bor jong ka ain.
Haba kylli ha kaba ia dei bad ka jingjia ha Tura ha kaba u principal bad u nonghikai jong ka Kendra Vidalaya kila shah kem halor ka jingkynnoh ba kila thmu ban leh beijot ia kawei ka khynnah skul kaba dang pule ha kane ka skul.
U myntri rangbah u la ong ba baroh kito kiba leh ia kine ki kam pyrshah ia ki kynthei khynnah kin ngat ha ka ain bad ai ba kiwei ruh kin sngewthuh ba ka ain ka don kat kiba leh palat ia ka ain kin shah pynshitom ha ki kyndon jong ka ain.
Ka jylla kala don lut ia baroh ki lad jingiada na ka liang jong ka ain bad ka ain kan leh ia kaba don kam ia kito kiba pynkhien.
