Shillong, Rymphang 02: Mynta ka sngi kala don ka jingiakynduh ha pdeng ka Synjuk ki Rangbah Shnong (SRS) bad u CEM jong ka KHADC u Bah PN Syiem ban ia kren halor ka VAB bad ha dien ka jingialang la shim ia ka rai ba kin leit ban ia kynduh noh ia ki bor jong ka Ministry Home Affair jong ka sorkar pdeng.
U Dr W. Kharshiing president jong ka Synjuk ki Rangbah Shnong, u la ong ba na ka liang jong ki dang ia pan jingbit ban ioh ia kynduh ia u myntri khynnah jong ka sorkar pdeng u ba dei peit ia ka tand kam poh iing u Kiren Rijiju bad ynda kila ioh ia ka sngi kin sa ia leit ban ia kynduh ia u.
Kane ka jingleit jong ki sha Delhi ka long ba kin leit ban wad ia ka jingtip na ka MHA ha ei kane ka VAB ka sah mynta bad kaei ka daw jong ka jingslem ba haduh mynta ym pat lah ban leh ie ie halor jong kane ka VAB kaba la don kam.
Halor kane ka juh ka phang na ka liang jong ka KHADC ruh kan leit ban ia kynduh ia ki bor jong ka MHA la ka long iano iano ruh ban tip shai haei kane ka VAB kala poi mynta, namar ba ka KHADC kala dep ban phah ia ki jingpynshai halor ka jingpan jingpynshai jong ka MHA lyngba ka sorkar jylla.
