Shillong, Naiwieng 13: Ki paidbah riew ngeit jong ka Balang Kothilik mynta ka sngi sa shi sien kila phla iala ka jingngeit ka jong ki da ka jingiashim bynta ka jong ki ha ka proseshon bah kaba la long mynta ka sngi ha Laitumkhrah Parsih, ha kaba ki riew ngeit na kylleng kila ia wan bania shimbynta ban pynpaw a ka jingialang kawei ka jong ki.
Ia ka jinglehniam leh rukom ia ka mass bakhuid bad ka jingkyrkhu la pyndep da u Arch Bishiop Rev Domonic Jala ba dei peit ia ka jylla niam Shillong ha ka jingiadon lang jong ki lyngdoh sohblei ha ryngkat ki riew ngeit jong ka balang kiba la ia poi na kylleng jong ka jylla niam.
Haba kren sha ki riew ngeit jong ka Balang u Arch bishop Dominic Jala u la ong ba U Khrist u ba long u maw nongrim jong ka jingsynei ba kum ki khun khristan kiba snoh ha U Trai kim dei ban pra kum u maw hynrei ia ka dohnud jong u Khun khristan kim ju pra ne duh namar ia ki la shna la pyn wandur da ki maw ba im kum ba u khrist u khot ia lade ba u dei u maw ba im.
U Archbishop u la kyntu ba kim dei ban tieng wat la wan u jumai uba jur ban pyntwa ia ki iing mane hynrei ka doh jong ki briew ki dei ka temple baim. Ka jingpoi jong ki riew ngeit sha kane ka prosehon kaba juh long man u snem ba pynpaw ia ka jingiatylli ka jong ki ki long na kylleng jong ka jylla niam Shillong, Jowai bad Nongstoin.
Ha ka proseshon la pynkup burom ia ki nongjop kiba tbit ban ai jingthoh ha ka kot Khubor ‘Iing Khristan” ba la ioh da i Kong Mercy Kharkamni da u Archbishop bad ka jingpyllait paitbah ia ka kot jong u Dr. Emil Nongbri uba la thoh ia ka kot kaba la ai kyrteng “Ka Ioh Ka Kot Ha ki jynthoh u Phadar H. Elias, SDB”
Ha ka por noh phaisngi la bud ka Proseshon bah ia kaba la ialam da ka diengphna, ha kaba ki nongshim bynta ha ki band ki don lai tylli ka Cathedral Band, Savio Junioriate Band bad ka Don bosco Band nangta ka kali kaba kit ia ka Sakrament.
Shuh shuh ha katei ka proseshon la shim bynta da ki Paid u Blei na Arunachal Pradesh Mizoram bad kiwei pat ki jaid bynriew. Nalor kitei ka kynhun tem bad nongshad Khasi na Laitkor Parish ki la noh lang ia u syniang u bynhei ka jong ki da ka shad ka phawar ha shilynter ka Lynti iaid Proseshon.
Ia katei ka proseshoh Iukharist kaba dei snem jingpynkut ia u Snem Jingsynei Ka kynhun Rwai St. Cecilia choir ka noh bynta ha ki jingrwai ha ka por Mass Bakhuid namar katei ka kynhun rwai ka la ioh ban rwai da kaba pynkhie im biang hadien la bun snem.
Ha ka por janmiet ka Kynhun rwai Serenity ka noh syniang lang ha ka jingrwai ban ialam ia ka Proseshon lehse ka dei ka sien ba nyngkong ia ka Cathedral Parish ban ai lad ia ki kynhun rwai jong ka parish ban shim bynta ar tylli mynta ka sien.
Hadien ka proseshon bah u Archbishop u la pynkut ia ka jingkyrkhu bad khang syndon ia U Snem jubilii da ka ba rah bad buh ia ka Sakrament sha Iing Mane Bah bad khang noh ia ka”Khyrdop bah”jong ka iing Mane Bah Laitumkhrah.
