Shillong, Rymphang 22: U CEM jong ka KHADC u Bah PN Syiem mynta ka sngi u la wanrah hapoh ka iing dorbar ia ka kaiphot ha kaba ia dei bad ka jingtohkit halor ka jingkynnoh ba kala don ka jingthep ia ka pisa jong ka KHADC na ka professional Tax sha ka account jong ki riew shimet ia kaba la tohkit da ki ar ngut ki Magistrate jong ka iing bishar jong ka KHADC.
Ia kane ka kaiphot la wanrah hapoh jong ka iing dorbar mynta ka sngi bad na ka liang jong ki dkhot ka iing dorbar kila ia kren sani bha ha kaba ia dei bad kane ka kam, bad ha dien ka jingikren hapoh ka iing dorbar la rai ban thaw ia ka House Committee ban bishar bniah ia kane ka kaiphot kaba la wan rah hapoh ka iing dorbar.
Ha ka jingiashim bynta ha kane ka jingiakren halor ka kaiphot kaba la wanrah da u CEM hapoh ka iing dorbar na ka liang jong u Bah PT Sawkmie, Bah Manstudy Nongrem nongialam ka liang pyrshah ka kong T S Thangkhiew bad u Bah HS Shylla kila ong ba ia kane ka kaiphot dei ban phah bishar bniah shuwa ha ka House Committee, namar ba ia u ba shah kynnoh ruh dei ban ai ka lad ban un ia sait ia la de.
Ha dien ka jingiakren hapoh ka iing dorbar, na ka liang jong ka Executive Committee kala pdiang ia kane jingai jingmut bad la thung ia ka House Committee ha kaba u nongialam ka liang pyrshah u Bah Manstudy Nongrem yn long kum u Chairman jong ka Committee.
Kiwei ki dkhot jong kane ka House Committee ki long ka kong TS Thangkhiew jong ka HSPDP, Bah Adelbert Nongrum jong ka KHNAM, Bah Teinwell Dkhar jong ka UDP bad u Joint Secretary jong ka Legislative yn long u member secretary jong kane ka house committee bad kane ka House committee kan pyndep ia kane ka kam jong ka hapoh shibnai bad ai ia ka kaiphot sha ka EC.
