Shillong, Lber 01: U Myntri kam poh iing ka jylla u bah Lahkmen Rymbui la ong ba ka sorkar jala dep ban phah ia ka kyrteng jong ki briew ban long ksiang ha ka jingiakren ia suk bad ka seng HNLC, ka sorkar kala phah ia ki kyrteng sha ka sorkar pdeng bad ka sorkar jylla ka dang ap ia ka jubab na ka sorkar pdeng.
U Bah Rymbui la ong ba u myntri rangbah ka jylla shen un sa leit sha Delhi ban ia kren ia ka kam khappud bad ha ka juh ka por kin sa ia kren ia kane ka kam bad u briew ban long ksiang u dei ban ia pdiang lang ha pdeng ka sorkar pdeng bad ka sorkar jylla.
U Myntri kam poh iing la ong ba ka sorkar kan pyndep shuwa ia kane ka bynta kaba nyngkong bad ia kiwei ki bynta ka sorkar kan sa pynbud katkum ki lynti bad kane ka dei ka sienjam kaba nyngkong bad ia kiwei kin sa pyndep ha dien pat, yn la thung ia u ksiang ka HNLC kan sa phah ia ki jingthoh sha u Ksiang.
U Myntri kam poh iing la ong ba katba kane ka jingpynkhreh ban poi sha ka jingiakren ia suk na ka liang jong ka seng HNLC ka dei ban sangeh noh ia baroh ki kam beain jong ka, ka HNLC ka dei ban sngewthuh ia ka jingkwah ka sorkar ban poi sha ka jingiakren ia suk.
