Shillong, Nailur 06: Mynta ka sngi kala don ka jingjia kaba sngewsih ha kaba shi kynhun ki nongleit kai sngewbha kila leit sha ka wah Mawbeh bad u wei na pdeng jong ki u la duh ei iala ka jong ka jingim na ka daw ba u la hap ha wah Mawbeh, kaba don ha Sohra rim.
Katkum ki khubor jong ki pulit la ong ba kane ka kynhun kila wan sha katei ka jaka ban pynlong ia ka jingiaid kjat hynrei sngewsih ba u wei na kine kiba la ia wan u ba la tip kyrteng kum u bah Savio Maring ba la 21 snem ka rta u la hap sha wah bad u la duh ei iala ka jong ka jingim.
Na ka liang jong ki pulit kila beh wud wud ban poi sha kane ka jaka ban ioh ban pynlait ia u hynrei kim lah ban leh ei ei shuh, ia ka met jong u la ioh ban sei na katei ka jaka bad la aiti sha kiba ha iing ha sem ha dien ba la pyndep ia ki jingdon kam baroh katkum ka ain.Kane ka jingjia ba sngewsih kala jia mynta ka sngi ha ka por kumba 1.30 noh phai sngi.
