Shillong, Naitung 15: Ki nongialam jongka KSU South West Khasi Hills District bad ka KSU Mawkyrwat Circle ki la hiar sha ka Shnong Ngunraw ban leit noh synniang daki marbam ia kawei ka longing jong kawei ka riew kynthei ha Shnong Ngunraw , South West Khasi Hills District. Ha kane ka sngi la iadon ryngkat ruh daki dkhot jongka KSU Ngunraw Unit.
Iaka kynhun jongka Seng la ialam da u samla Forwardman Nongrem President KSU South West Khasi Hills District, u samla Marconi Thongni Finance Secretary KSU South West Khasi Hills District, u samla Rutherford Lyngdoh General Secretary KSU Mawkyrwat Circle , ki dkhot ka KSU Ngunraw Unit bad kiwei kiwei.
Kane ka longing jongka Shnong Ngunraw ka dei ka ing ka sem jong kong Mrasidora Thongni kaba don ruh kumba 8 ngut ki khun kynthup ruh iwei i khyllung ba dang shibnai.
Ka jinghiar jongki dkhot ka Seng ka long hadien ka jingiohi ha ki lad pathai khubor iaka kyrwoh khubor naki briew Shnong ba ka dei ka longing kaba shem jingjynjar wat ban pynbiang iaki khun ki kti ba dang rit nalor ba ka dei tang ka riew kynthei ha kaba kum ba long mynta ka hap ban shaniah ha u khun nyngkong ba dang 18 snem ban iarap lem iaka ing ka sem .
Haka jingleit jurip jongka Seng, ngi la lap ba kane ka longing kim pat don ka ingsah lajong ha kaba ia mynta shipor la shu ai sngewbha da ki parashnong iaki ba kin ioh sah shipor .
Kum ka Seng ngi pynpaw iaka jingsngewnguh iaki nongialam shnong ba ki la pyndep iala ka bynta ban noh synniang sha kane ka longing bad ngi sngewban ai khublei ruh iaki riewrangbah kane ka Shnong ba ki la pyni ia ka mynsiem ban iarap lem ia kiba shem jingeh jingjynjar.
Kane ka longing ka don 4 ngut ki khun shynrang ba dang 18 snem 15 snem , 11 snem bad 1 snem shiteng . Ka don ruh 4 ngut ki khun kynthei ba dang 12 snem, 7 snem , 3 snem bad i khunlung bad dang 1 bnai tam.
Haba iohi halor kine ki jingeh jong kane ka longing bad kumba ngi la lap da la ki jong ki khmat ba kane ka longing ka shem jingeh ban pynbiang iaki jingdonkam khamtam haba kiba bun ki khun jongki ki dang rit bad kim pat lah ban kamai ban pynbiang iaka ing ka sem.
Kum ka seng kala sngewdei namar kata ban kyntu iaki bor sorkar ba kin peit lem ia kiba kum kine ki longing khamtam ha kiba kum kine ki por jongki jingeh na ka daw ka jingpynthud bad pynjynjar iaka kamai kajih na ka daw jongka khlam COVID 19.
Ki katto katne ki longing ba ka Seng ka la ioh ban noh synniang baroh shikatta lehse ki dei tang kiba paw bad kiba bun lehse kin nym lah ban pynpaw shabar. Ngi kyntu namar kata ia ki bor sorkar , ka district administration bad ka Ophis Mawkyrwat C&RD Block ba kan leit peit lem ym tang ia kane ka longing hynrei ban hiar ruh shaki jaka ba kham kyndong jongka District ban lap iaki jingeh bad ban ai ruh iaki jingiarap khamtam ha kiba kum kine ki por.
Ka Seng ka dawa naki bor District bad ka Ophis Community and Rural Development Block ba ki dei ban pynthikna ba ki longing ba shem jynjar ki dei ban don kyrteng kum ki job card holders khnang ban ioh jingmyntoi lyngba ka MGNREGS bad ban plie lynti ruh ia kiwei kiwei ki lad jingiarap, kane ka dei ka kyrwoh na u samla Marconi Thongni nongialam ka seng KSU.
