Shillong, Jylliew 16: Mynta ka sngi kala sdang ka jingai tika ia ki briew kiba shong dukan ha Iewduh, ia kane ka jingai tika la pynlong ha ka ophis jong u police syiem ka hima Mylliem ha Iewduh, ha kane ka sngi la iohi da ki spah ngut ki briew kila ienglain ban ioh ai tika ia lade.
Haba kren ha ki lat pathai khubor ki myntri jong ka Hima Mylliem u myntri Kharlukhi bad u Myntri Langstieh kila pynpaw ia ka jingsngewnguh ia ki bor jong ki District Adminstration ba kila pdiang ia ka jingkyrpad jong ka Hima ban ai Tika ia ki nongshong dukan ha iewduh.
U Mytnri Kharlukhi u la ong ba kum ka hima ka kyntu ia ki paidbah ba kin wan sha khmat ban ai Tika na ka bytna ban ioh ia ka jingiada na kane ka jingpang khlam COVID-19 kaba ka jylla ka dang ialeh tyngeh ban iada ia kane ka jingpang kaba la ktah ia ka khaii pateng.
U Myntri Langstien u la kyntu ia ki paidbah nongshong iew ba kin shim ia kane ka kabu ban ai Tika na ka bynta ka jingshngian jong ka iing ka sem kiba ia shong dukan lang bad ha ka juh ka por na ka liang jong ka Hima ka but ia ki jingbthah kong ka sorkar ha ka jingiakhun pyrshah ia kane ka khlam COVID-19.
Ka Magistrate kaba don ban peit lang ia kane ka jingai Tika ha Iewduh kala ong ba kane ka jingai Tika ha Iewduh kan long mynta baroh saw sngi lynter bad naduh la shai ka sngi kin pynlong ia ka jingai tika ha ki ar tylli ki jaka kawei ia kiba la 45 snem shaneng bad kawei ia kiba 18 snem sha neng.
Ha kine ki sngi ka ophis jong ka Deputy Commissioner jong ka East Khasi Hills kala pynmih ia ka jingkyrpad ia ki paidbah ba baroh kiba don dukan ki dei ban ai Tika bad lada kin lah ban ai Tika yn nym shah ban pli ia ki dukan katba kim pat ai tika.
