Shillong, Jylliew 13: Ka la long ka sngi pdiang Jingkyrkhu bad ka ban sah jingkynmaw ia ki Paidbah jong ka Dong Tmoi, Lynshing namar ba ka jing angnud kaba la slem jong ki Paidbah ban ioh ia ka Pukri Um kaba Tikna ha ryngkat ki jaka saitjain kiba janai ban pynsuk ia ki Paidbah Nong Shong Shnong kiba ju shaniah tylli tyllan lyngba jong kane ka Tyllong Um ka bym ju rngad baroh shisnem.
Ia katei ka jingangnud la pynurlong da ka jing shimkhia jong u Bah Banteidor Lyngdoh (Bah Pai), MDC Mawkynrew Constituency uba la bei tyngka ia ki jinglut jingsep baroh lyngba ka MDC Scheme ban pynbha bad shna Pura ia katei ka Tyllong Um bad ban pyn ioh ruh wat ia ka jaka Saitjain kaba tikna na ka bynta ka jingbit jing biang jong ki Paidbah Nong Shong Shnong.
La plie paidbah ia kane ka Tyllong Um bad ia ka jaka Saitjain da utei u MDC jong ka Mawkynrew Constituency hapdeng ka jingialang kaba iphuh iphieng ha kaba la ia donlang ruh da u Bah Raison Nongrum, Sordar Shnong Lynshing, U Babu R.D. Lyngdoh Head Master jong ka Tmoi Presbyterian L.P. School, Samla Jerimaia Lyngshing, President Youth Brotherhood Sports Club, Samla Andrew Bina, Secretary Youth Brotherhood Sports Club bad ruh uwei na ki Samla Rangbah ba pawkhmat jong ka Thain u Bah Compromise Nongrum uba dei ruh ha kajuh ka por u President jong ka Lamlynti Social & Cultural Club ha kaba la pyn shongshit ruh da ka jing wan ia shimbynta shitrhem da ki khynnah Skul jong ka Tmoi Presbyterian L.P. School, Lyngshing.
Haba kren kum u Kongsan ha katei ka sngi na ka liang jong u Bah Banteidor Lyngdoh, u la ong ba kum u Nongmihkhmat ha i bor iba rit kum u MDC, u la pyrshang ban ai ia ka jingshakri kaba janai tam bad kaba khuid kaba suba ban sam ia baroh ki schemes haba shit haba shai khlem ka jingleh shiliang khmat iano iano ruh na ka bynta ka jingbit jingbiang jong ka Constituency hi baroh kawei. u la ai khublei kyrpang ruh ia ki Nongialam bad Nongkitkam jong ka Youth Brotherhood Sports Club kiba la trei bha bad trei sani ia ka jingtrei kaba u la ai lyngba ka MDC Scheme ha kaba u la ong ruh ba kane kan long ka Nuksa ia kiwei pat ki Shnong kiba marjan kiba hap hapoh jong ka Mawkynrew Constituency ba kin don ia ka mynsiem jong ka jing iatreilang na ka bynta ka jingbit jingbiang jong ki Paidbah Nong Shong Shnong ha kaba u la kyntu ruh ia ki Paidbah ba kidei ban sumar bad pynneh pynsah ia kine ki matti namar ka jing myntoi kadei ka jong ki hi.
Hashwa ka jing plie paidbah ia katei ka Tyllong Um bad ia ka jaka Saitjain ha ka Dong Tmoi, ha katei kajuh hi ka sngi u Bah Banteidor Lyngdoh u la leit ruh ban plie paidbah ia ka lynti iaidkjat ha ka Dong Nongthymmai jong ka Shnong Lyngshing.
