Jowai, Jylliew 16: ka long ka ei kaei kaba sngewkhia bad sngewsih haduh katta katta iaka thain Ri lum Jaintia Baroh kawei khamtam ia ki samla wad kam, kiba hap ban iakhun lyngba ka MPSC namar ka jingjah rngai noh ka Jwai Centre na ka thup jongka MPSC, kynthoh ka JSU.
ka Jaintia students’ Union (JSU) ka kwah ban tip shai balei la pynjah noh iaka Jowai Centre ha ka Application Form jongka MPSC ha kaba mynshwa ki don lai tylli ki Centre kata ka Shillong, Jowai bad tura, hato kane ka dei ka jingleh khnang ne ka jingbakla lane ka jingbym khein snep shuh ia ka thain ri lum Jaintia.
ka JSU kala sakhi ba ha kine ki snem kiba la dep, ka Jowai Centre ka paw beit hapoh kane ka Phorm jongka MPSC, bad kino kino kiba kwah ban thoh iaka Exam ha poh Jowai ki lah ban tic lane pyndap daka Jowai Centre, hynrei mynta pat kane ka Centre kam don kyrteng shuh hapoh ka phorm bad la sah satang ka Shillong bad tura bad ia kane la sakhi lyngba ki Application Phorm jongka MPSC kiba la print lane pyllait haka 25 / 02/ 2016.
kum ka jingpynmaw ha u snem 2012 ka hadien ba ka rilum Jaintia kala ioh iaka MPSC Cell ha Jowai, ka MPSC badon burom, kala juh pyllong iaka Examin thungkam jongka hangne ha Sor Jowai, bad kane ka examin ka
iaid beit iaid ryntih bad ka long shisha ka jingiarap kaba khraw ia baroh ki samla wad kam lyngba ka MPSC namar kim donkam shuh ban leit thoh examin shaduh sha shillong.
Ha kane ka jingkhot application ba dangshen jongka MPSC, ka JSU ka lalap ba ki nong aplai ki bun bha napoh ka Rilum Jaintia kiba la poi shaka 2000 (ar hajar ngut ei ei) bad mynta kine baroh kin leit thoh examin sha shillong lane tura bad lada khein tang ka bai kali, ki hap ban pyllut haduh 200/- marwei bad lada kheinlang baroh ka bai kali kala kot shaduh ka 4 Lakh, bad kiba wan lei lei na nongkyndong ym lah shuh ban mut dur haduh katno ki kynduh jingeh.
kumta halor kane ka bynta ka JSU ka dawa, na ki 7 ngut ki MLA jongka thain Ri lum Jaintia ba kin shimkhia bad pynbeit shi syndon ia kane ka jingeh jongki samla wad kam, bad kumjuh ruh iaka Commission (MPSC) ba ka dei ban pyllong beit iaka examin ha Jowai, kum kawei naki Centre naka bynta baroh kito kiba ai address ha ri lum Jaintia kum ba la buh naduh mynshwa bad ym dei satia ban pynduh pyndam iaka.” ia kaei kaei kaba bha kaba la don naduh mynshwa ladei ban pynbha shuh shuh ym ban pynduh pyndam, ong u President ka JSU”. lada ka Sorkar lane ka Commission ka leh bym suit niew ka JSU kan shim pat da kiwei ki lad ki lynti.
