Shillong, Rymphang 27: U Block Development Officer jong ka Mawthadraishan Community bad Rural Development mynta ka sngi u la dep ban jurip ia baroh ki long iing kiba la shah lynshop ha ka jingjia ba sngewsih ha ka jingkylla ka tork ha ka step sngi u blei ha kaba 17 ki mynsiem kila duh ei bad 62 ngut kiwei pat kila mynsaw.
Ha dien ka jingphah sngewlem jong u mynti rangbah u Dr Mukul Sangma ha kaba u la ong ba ka sorkar kan ialeh ban ai jingiarap na ka bynta ki long iing kiba la ngat ha kane ka jingjia ba sngewsih, na ka liang jong u BDO jong ka Mawthadraishan mynta ka sngi u la pyndep ia ka jingjurip bad ia kane ka kaiphot yn phah sha ka sorkar hapoh jong ka Political Department.
Na ka liang jong ka ophis jong u Deputy Commissioner jong ka West KHasi Hills District ia mynta ka dang ap ia ka jingbethah na ka political department kumno ban leh ha kaba ia dei bad kane ka jingjia ba sngewsih, na ka liang jong ka sorkar kala long shai ba kan ai ia ka jingiarap tang ha kane ka rukom ym pat lah ban ong namar ki dang ap ia ka jingbethah na ka political Department kaba dei peit ia kane ka kam.
Ha kane ka jingjia kaba sngewsih kiba la duh noh ia ka ka jingjim ki dei ki briew na ka shnong Nongbudum, Mawbyrkong bad Nginiong. Ia baroh 17 ngut kiba la duh ei iala ka mynsiem kaba kordar ka jong ki la tep don burom mynta ka sngi ha baroh lai tylli ki tei ki shnong. U Bah Kimfa Marbaniang MDC jong ka Rambrai Jyrngam u la ong ba mynta ki dang ia wad lad wad lynti kumno ban pynioh ia ki jingiarap sha kine ki long iing kiba la mat ia kane ka jingjia ba sngewsih.
