Shillong, Lber 24: U Myntri Khynnah ka tnat kam pohiing jong ka Sorkar Pdeng, u Nityanand Rai u la ai jingkren ha ka lyngkhuh dap 187 snem ka raising day jong ka Assam Rifles ha Shillong mynta ka sngi kum u kongsan jong kane ka jinglehkmen.
U Nityanand Rai u la pynkup burom ruh ia ki shipai kiba la ai ia la ka jingim na ka bynta ka ri. U Director General ka Assam Rifles, Lt Gen P.C. Nair, ki ophisar bad ki shipai ka Assam Rifles ha ryngkat kiba haiing jong ki na kylleng ka ri ki la iashim bynta ha kane ka jinglehkmen lyngba ka video conferencing.
Ha ka jingkren jong u, u Nityanand Rai u la ong ba la seng ia ka Assam Rifles ha u snem 1835 kum ka ‘Cachar Levy’. Ka Assam Rifles ka dei ka kynhun shipai kaba la ioh khur bun tam ki khusnam gallantry hapdeng baroh ki kynhun shipai ha ka jingiaid lynti jong ka kaba la bun bun snem. Kane ka kynhun mynta ka long kaba la tbit bha ha ki kam iada ri.
U Myntri khynnah ka tnat kam pohiing u la ong ba lyngba ka jingiaid lynti kaba jrong bha, ka Assam Rifles ka la nohsynniang bha sha ka jingpynthikna ia ka shongsuk shongsain ha ka thain shatei lammihngi kaba la shah ktah ha ki kam lehnoh bad ruh ha Jammu bad Kashmir bad ba ka la trei borbah ban iada na ki kam khaii drok.
Ka Assam Rifles ka dei ka kynhun kaba trei shibun ki jait kam, ka don ar tylli ki battalion ha Jammu & Kashmir bad kawei ka NDRF battalion kaba ai jingiarap haba ka don kano kano ka jinglynshop ka mariang.
U Nityanand Rai u la ong ba u Myntri Rangbah Duh jong ka ri, u Narendra Modi u niewkor bha ia ka bha ka miat jong ka ri bad jong ki kynhun shipai. Hapoh ka jingialam jong u Myntri Rangbah Duh, ka Sorkar ka la shim shibun ki rai na ka bynta ka bha ka miat jong ki shipai bad ki longiing jong ki.
U Myntri ka tnat kam pohiing, u Amit Shah u la ong ba ka Assam Rifles ka dei kaba iada ia ka thain shatei lammihngi bad ka kynhun shipai kaba rim tam jong ka ri kaba dap da ki jingjop bad ka jingshlur.
U Rai u la ong ba ka tnat kam pohiing ka la ai ia ka jingmynjur shipor ia ka jingseng sa san tylli ki battalion khnang ba ki shipai ki ioh ia ka lad ban im hajan ki longiing jong ki ha ki jaka kiba ki sngewtynnad.
Da kaba peit ia kane, ka Sorkar ka la pynkup bor ia ka Assam Rifles hapoh ka NDPS Act. Kane ka dei ka rai kaba la pyrkhat bha, bad lyngba kane, ka Assam Rifles ka la ioh kurup shibun ki mar pynbuaid bad ki drok kiba kot sha kumba T. 40 klur ha une u snem ba la dep.
U Myntri khynnah ka tnat kam pohiing u la ong ba da ka jingthmu ban kyntiew ia kane ka kynhun, mynta ka kam ka dang iaid ban thung kam shuh shuh ia ki shipai bad ban pyntbit shuh shuh ia ki.
La pynlong ia ka jingpeit bniah ia ki shipai ha u snem 2003 bad kane kan iarap ban pynbiang ia ki jingdonkam jong ki katkum ka juk mynta bad pyntbit shuh shuh ia kane ka kynhun.
U Rai u la ong ruh ba ka jingthmu ban pynthymmai ia ka Assam Rifles ka dei kaba la ioh jingmynjur bad mynta dang pyntreikam ia kane. Ha ryngkat kane, yn pynkhlain ruh ia ki jingdon jingem kiba iadei bad ki tiar ialeh katkum ka juk mynta, ka jingpyniasoh, ka jingpeitngor bad ka jingai jinghikai.
U Rai u la ong ba wat hapdeng ki jingeh kiba wan na ka khlam COVID-19, kane ka kynhun ka la lah ban thung kam thymmai ia 5,192 ngut ki shipai. Ha ryngkat kane, ka jingthung kam sa ia 4000 ngut ki shipai ka dang iaid shakhmat.
U Nityanand Rai u la ong ba ka Assam Rifles ka la trei borbah ban pynthikna ia ka jingryntih hapdeng ki shynrang bad ki kynthei bad ruh ka jingpynkup bor ia ki kynthei kaba la wanrah ia ka jingthep kam haduh 1,187 ngut ki kynthei ha kane ka kynhun. U Myntri khynnah u la ong ba u dap da ka jingkyrmen ba ki kynthei kin dang kham bun katba dang iaid ka por.
U la ong ba ka jingphah ia ka kynhun jong ki kynthei sha ka Democratic Republic of Congo ka pynkhlain ia ka jingthmu ban pynkylla ia ka India sha ka ri kaba donbor.
Watla ka India ka la nohsynniang sha ka kam jong ka UN ban pynthikna ia ka jingshongsuk shongsain la bun bun snem mynta, ka jingdon jong ka kynhun Riflewomen jong ka Assam Rifles ka wanrah sa ia kawei ka bynta sha ka jingkut jingmut jong ka ri na ka bynta ka jingbha jong kiwei kiwei ki ri.
U ai khublei ia baroh ki riflewomen kiba la pynurlong ia kane bad nga kyrmen ba kin trei kham bha ha kine ki por ban dang wan. Ka Assam Rifles ka donkam ia ka jingiaroh na ka bynta ki jingnoh synniang na ka bynta ka jingpynkupbor ia ki longkmie kaba paw shai lyngba ka jingtbit jong kine ki riflewomen.
U Myntri khynnah ka tnat kam pohiing u la ong ba baroh ki kyrdan jong ka Assam Rifles ki hap mad shibun ki jingeh na ka bynta ka jingshngain jong ka ri bad kumta ka bha ka miat jong ki ka dei kaba kongsan ia ka Sorkar.
Ka la sdang ia shibun ki skhim kum ka e-Awas portal kaba pyni ia ka jingkut jingmut jong ka Sorkar ban pynthikna ia ka bha ka miat jong ki shipai. Ka sienjam ‘Bharat Ke Veer’ jong ka Sorkar ka la noh synniang kumba T. 5.57 klur naduh u snem 2016 sha ki longiing jong 44 ngut ki shipai kiba la aiti ia la ka jingim.
Shuh shuh, khnang ban plié lad pule puthi ia ki khun jong ki shipai kiba dang trei bad kito kiba la shongthait, ka Sorkar ka la buh reservation ha ki jingpule MBBS / BDS ha katto katne ki jaka pule bad ki longiing jong ki shipai ki ioh jingmyntoi bha na kane.
U Nityanand Rai u la ong ba ka Assam Rifles ka pynlong ia ki medical camp, ki skhim ban pynkup bor ia ki longkmie, ki jingialam sha kylleng ka ri bad kiwei kiwei ki kam na ka bynta ki briew hapoh ka Civic Action Program.
Dei ban bteng ia kine na ka bynta kito kiba don ha ka jingeh khnang ban buh ia ka nongrim na ka bynta ka roi ka par ha ka thain shatei lammihngi. La thung kumba 31 lak tylli ki dieng kaba long ka jingthung dieng kaba bun tam hapdeng baroh ki kynhun kiba hap hapoh ka tnat kam pohiing.
U la ong ba baroh ki shipai ka Assam Rifles ki la ioh baroh lai bynta jong u dawai tika COVID-19 kaba la pynurlong ia ka thong jong u Myntri Rangbah Duh ka ri, u Narendra Modi, ha ka por kaba duna bha.
U Myntri khynnah ka tnat kam pohiing u la ong ba mynta ka sngi, ha kane ka jingdap 187 ka raising day jong ka Assam Rifles, nga kwah ban iathuh ia baroh ki shipai kiba shlur jong kane ka kynhun ba ka Sorkar kan sumar ia ki. U la ong ruh ba kyrmen ba ka Assam Rifles shen kan long ka kynhun shipai kaba ialam lynti ym tang ha India hynrei shabar ri ruh.
