Shillong,Nailar 07: Ka Durbar jong ki 3 Shnong ha kaba la don lang ki Rangbah Shnong bad ki Executive Member jong ki 3 Durbar Shnong Mawlai Nonglum, Iewrynghep bad Nongkwar ka la long ha ka sngi saitjain ha ka 2 tarik ‘Nailur 2014 ha Iing Skul Mawlai Presbyterian HS School, Mawlai Iewrynghep. Ia ka jingialang la pyniaid da U Bah S D Khongwir Rangbah Shnong Mawlai Nonglum. U Bah Khongwir
ha kane ka jingialang u la maitphang ba ka mat kaba kongsan ha kane ka jingialang ka long halor “Ka jingshngain ha ka leit ka wan ki nongshong shnong jong kine ki 3 Shnong khamtam ki heprit, ki tymmen ki kro bad ki khynnah skul” ha ka Surok GS Road naduh jingkieng Mawlai ter ter shaduh Mawlai Nongkwar. U Bah Kynsai M Lyngdoh bad Bah Rapbor R Thangkhiew Rangbah Shnong Mawlai Iewrynghep bad Nongkwar ki la pynpaw ka jingsngewnguh kaba khraw ia ki nong shong shnong ki 3 Shnong ba ki long kiba kloi ban ia mih ryntih bad ia trei lang kumno ban ia poi sha ki rai ki ban kham pynsuk ia ka iaid ka ieng ki nongshnong shnong bad kumno ban kham pynduna na ki jingdheng kali bad aksiden.
Ha kane ka sngi la ioh ruh ka jingkren ai jingmut lem na kiba bun ki nongshong shnong bad dkhot committee ki 3 Shnong bad kumjuh ruh na I Bah W M S Pariat, IAS iba dang shu dep shong thait shen na ka kam Chief Secretary halor ka phang kumno ban pynwandur ia ka rukom pyniaid kali, pynkhuid ia ki rud bad kiar surok bah GS Road bad khamtam ban don ka jingiatreilang ha pdeng ka Police Dept, PWD, PHE bad ki Durbar Shnong bad ki paidbah. Ka jingialang ka la shim ia ka rai ban buh noh da U Zebra Crossing (Lain Lieh Napdeng Surok) ha lad Iewrynghep – Nonglum bad Petrol Pump Thangkhiew Point. Ia kine yn pyndep hadien ba la dep jurip lang da ki dkhot ba la jied na ki Durbar 3 Shnong ryngkatlang ka jingdon ki Engineer PWD bad In-charge Traffic Police Branch Shillong la kumno kumno hadien ka Independence Day.
La iarai ruh ba kan don ka jingialang ai jinghikai kumno ki paidbah khamtam ki khynnah skul, ki heprit, ki tymmen ki kro ba kin nang ban pyndonkam ia u Zebra Crossing/Line. Ha kaba ia dei bad ka jingbuh ia ki Traffic Police 2 ngut ha lad Iewrynghep – Nonglum, na ka liang U Bah N K Syiem, SP Traffic Shillong u la pyntip ba la buh uwei ia mynta bad shen yn sa buh hi 2 ngut hadien ba la dep pynbiang ia ki jingdonkam baroh na ka liang ka office. Kane ka jingbuh ia ki Traffic kan long ruh na ka bynta ka sngi U Blei ruh nalor ba ki la don lypa ha Lad ban noh sha Wah Umkhrah lynti Weiking bad Petrol Pump Thangkhiew Point.
La iatai ruh halor ka rukom kumno ban pynkhuid bad lum ia ki nuit ha shilynter surok GS Road bad kumno ka PWD ka dei ban pyndap biang bad maramot ia ki thliew (pot holes) ha surok khnang ban kham lait na ki jing ia takhuh bad dheng kali. Na ka liang ka PWD ba la wan mih khmat da U SDO Bah Y Lyttan. Na ka bynta U Centre Line ha U Suok GS Road ynsa pyndep noh shen khanang ba ki kali kin ym jam palat ia u pud lajong. I la ban ba na ka liang ka Dept ka la leh katba lah ban pyndep la ki kamram nalor ba ki nongtrei ki don tang khyndiat ban trei bad kaba kham sngewtynnat ka long ba ka PWD ka la sdang ban maramor ne repair surok da ki kynja tile kum ha neng jingkieng Mawlai haba ia tyngkhuh bad ka jingpei um ha surok. Ha kaba ia dei bad ka jingpei ne jingleak ki pipe um PHE, na ka liang U SDO PWD I la pynshai ba ia ki jingpei um kiba rit lah ban maramot da ka PHE da kaba ioh jingtbit tang na ka ophis EE PWD.
Hynrei na ka bynta ki jingpei um kiba heh bad ki kam ban buh pipe um kiba thymmai hap ban pan jingtbit shwa na U O/O Chief Engineer PWD ha shwa ba ka PHE kan ktah ne pynpra ia ka surok ha kaba maramot ne buh ki pipe um. Ka jingialang da kawei ka jingmut ka la ia beit ruh ba yn hikai ia ki paidbah, ki khun samla bad khamtam ki khynnah skul kumno ban sngewthuh khambha ruh shaphang ka rukom pyniaid kali (traffic) ryngkat bad ka Traffic Police Branch ia kaba yn sabuh noh shen ruh ha Mawlai PS Nongkwar.
Na ka liang ki Rangbah Shnong ki la kyrpad ba ki paidbah kine ki 3 Shnong ki dei ban don ka mynsiem ban ia treilang bad ki bor pyniaid kali (traffic police) bad kumno ban ia mih ryntih shakhmat ban hikai ia kiwei ban sngewthuh ia kaei kaba la thoh ha ki sign board bad kumno ban sngewthuh ban pyndonkam ia U Zebra Crossing/LIne.
Ka jingialang ka a kut noh da ka khmih lynti ba ki dkhot ba la jied na ki 3 Durbar Shnong kin shim ia ka bynta kaba khraw ban pynlong ia U Surok GS Road ban shngain ha ka leit ka wan ki paidbah. Bad la khmih lynti ba kiei kiei kiba la iarai yn iohi ia ki soh jong ki ha shwa lane ha ka Sngi Laitluid ka Ri India. Ha kaba wai artat ka Durbar ka dap da ka jingsngewkmen bad ai burom ia I Bah W M S Pariat iba la pynlait por ban don lang ha ka Durbar Ki 3 Shnong.(SP News)
