Jowai, Iaiong 27: Ka Khasi Students Union Jaintia Hills District Unit ka kyntu iaka National Green Tribunal bakan phaikhmat sha ki Company Cement Factory bad ban shimkhia ruh ban phah khang khyrdep noh shwa ia baroh ki Cement Plan kiba don hapoh ka East Jaintia Hills namar ka jingdon ka ki Cement Plan ha katei ka Thain ka pynjot pynjulor lut iaki khlaw ki btap, ki um ki wah bad ka khyndew ka shyiap ha ka thain East Jaintia.
Ka jingthmu ka NGT ban phah khang khyrdep ne pynsangeh iaka jingtih dewiong hapoh ka Jylla da kaba aidaw ba ka wanrah iaka jingma bad jingjulor ka mariang ka long kaba bakla namar ka jingma kaba khraw tam eh ka dei naka jingpynjulor bad pynsyllen lut iaki khlaw ki btap, ka jingpynsniew iaki um ki wah bad ka jingpyntwa iaki lum daki Company Cement’ la ong u General Secy ka KSU JHDU u Samla Streamly Niangti.
ka jingdon u dewiong ka pynkiew bha iaka ioh ka kot jöng ki trai jyla ritpaid ha ka liang ka khaii ka pateng bad ka kamai ka kajih, hynrei ka jingdon ki Cement Plant pat ka pynmyntoi tang iaki mynder kiba wan naki Jylla bapher bapher kum na Haryana, Pynjab, UP bad Delhi. Kine ki wan tang ban kjit iaka spah ka phew jong ka Bri u Hynniewtrep, kim wanrah eiei ruh ka jingmyntoi. Kumta lada ka NGT ka sngewkhia shisha iaka jingjulor ka mei mariang kala dei ban khang khyrdep shwa iaki Cement Plant hapoh East Jaintia kaba long trai da u Nongwei ne u Bar jylla’ la pynpaw utei u Samla.
Ka Seng ka kyndit ruh ban iohi iaka jingujor mukotduma ka All Dimahasa Students Union bad ka Dima Hazao District Committee da kaba kynnoh bad tuklar ba ka jingtih dewiong ha Jaintia Hills ka pynjulor iaka Wah Kupli kaba dei kawah ba ki juh shaniah iaka Umbam Umdih, dakaba ki ne ki Ar Seng pat ki klet pat iaka jingtih dewiong daki Khar Assam ha ki bynta jong ka Rud Wah Kupli kaba dei ka dawbah jong ka jingkylla rong bad jingsniew ka Wah Kupli.
Wat haki por bympat don ka jingsniew ka Wah Kupli ruh dei ki Khar Assam bashait wieh bih bha ha Wah Kupli ban ioh kem Dohkha’ la ong u Samla Niangti, ‘imat ka jingujor mukotduma ka ADSU bad ka DHDC iaka jingtih dewiong ha Jaintia Hills kadei tang ka jingdon ka mynsiem bishni iaki briew jong ngi bad imat ka lah ruh ban don ka jingkynshoit daki katto katne ki hehspah hi naka thain jong ngi kiba juh kwah ban pyntreikam iaka Mining Policy haka jylla’ la pynpaw u Samla Niangti
Khatduh ka Seng ka kyntu iaki paidbah ka jylla bam kimdei ban duh jingkyrmen bad naka liang ka seng ruh kam ailad iaka Sorkar ban pynsangeh ne ban knieh iaka pliang ja ki paradoh parasnam jong ngi, la pynkut ka kyrwoh na utei u Samla.(SP News)
