Shillong, Iaiong 12: Ka Ranikor Block Congress Committee (RBCC) mynta ka sngi kala pynshai paidbah ba ka jingai jingiarap ha ka jingshah lynshop jong ka mariang ka long nyngkong shuwa ia kito ki long iing kiba la shah pynjulor palat, ban ong ba ka don ka jingleh shiliang kumba la kynnoh da ka seng KSU ka long ka bym don nongrim ha ei ei ruh.
Haba kren ha ki nongthoh khubor mynta ka sngi ha Shillong Press Club u president jong ka RBCC u la ong ba ka jingkynnoh jong ka seng KSU ba kala don ka jingleh politic ha kaba ai ia ki jingiarap ha kine ki sngi ba don ka jingshah lynshop ha ka mariang ha poh jong ka Ranikor Konstitwensi ka long ka bym don nongrim ha ei haei ruh.
Mar ia tip ia kane ka jingjia ba sngewsih na ka liang jong u MLA kane ka jaka u Martin M Danggo u la leit hi da la de bad ryngkat ki lad jingiarap bad ha kaba sam ia ki jingiarap la ai nyngkong sha kito ki long kiba la shah ktah jur ha kane ka jingshah pynjulor ha ka mariang kam shym don kata ka jingleh shiliang.
Kiwei ki nongialam jong ka RBCC kiba la ia don lang ha kane ka sngi ban pynshai ia kane ka jingkynnoh jong ka seng KSU, la don lang u General Secretary u Nelbi B Sangma, u Bah Kitborlang Nongrem bad u Bah Jotin Khardewsaw kiba la pynshai lang ia kane ka jingkynnoh jong ka seng KSU.
