Jowai, Naitung 27: Ka Khasi Students Union Iooksi Unit kala pynpaw iaka jingsngewkhia halor ka jingpynslem kai jong ka sorkar ban pyntreikam iakita ki ain ki ban tehlakam ne pyrkhing iaka jingrung jingmih u mynder katba u mon shapoh ka Bri u Hynniewtrep.
Ka seng ka ong ba lada ka sorkar ka pyntreikam ne pyllong ain kloi kloi ia baroh ki to ki jingai jingmut ne kata ka Comprehensive Mechanism bala phah daki 13 Sengbhalang shaka sorkar kan jin dala long ka jingmyntoi iaka jaitbynriew rit paid jong ngi iakaba la jantyllep da u nongwei.
Hadien bala mynjur ne pdiang daka sorkar iaki jingai jingmut jongki sengbhalang sha ka Sorkar naka bynta ban pyrkhing mynder ngi la sngewioh mynsiem khyndiat, hynrei mynta pat ka sorkar kala pyllut kai iaka por dakaba thaw syndon haduh lai tylli ki Committee bad la ai por iaki tei ki Committee haduh ar bnai ban pyndep iaka kam.
kawei naki tei ka Committee kadei tang ban peit ne jied iaka jaka rung jaka mih ki mynder (Entry and Exit point). Kane ka jingai por haduh arbnai iaki tei ki Committee kadei tang ka buit pynslem kai iaka por (Delay Tactics) jong ka sorkar jylla naka bynta ban pyntreikam iaka jingai jingmut ki 13 Seng. Balei ka shimpor haduh arbnai iaka sorkar tangban jied iaki Entry bad Exit point .
Imat baroh kita ki myntri sorkar kimjuh leit poi sha ki bynta khappud ka jylla haduh ba kim tip wat tang iaki jaka rung jaka mih ki mynder. Kam shimpor wat tang ar taiew ruh iaka sorkar ne iakata ka Committee ban pynbna iaki tei ki jaka rung jaka mih ki mynder lada ka mon ban pyntreikam kloi iaka ain pyrkhing mynder.
Kitei ki Committee ki lah ruh ban duh ban dam noh lada ka sorkar u Mukul Sangma ka khyllem noh. Lada ka sorkar u Mukul Sangna ka khyllem khkempep kita ki jingai jingmut ki 13 Seng shaka sorkar ban pyrkhing mynder ki shu long sepei noh namar khlempep u nongialam thymmai ne ka kynhun myntri thymmai kim pdiang iaka tei ka jingai jingmut ki 13 seng ia kiba la pdiang ne mynjur da u Mukul Sangma.
Kumta naka liang ka KSU Iooksi Unit ka kyntu iaki nongialam ki 13 Seng ban dawa jur naka sorkar ban pyntreikam kloi iakito ki jingai jingmut ne kata ka COMPREHENSIVE MECHANISM bala dep phah sha ka sorkar jylla namar ka jaitbynriew kala donkam kyrkieh iaka ain ban iada iaka naki mynder bala wan buhai shnong hangne ha Ri jongngi.
Haka juh ka por ka Seng ka pynrem jur ruh iaka jingshah bom shah tied ki pulit Enforcement ka KHADC bad ki nongthoh kotkhubor haki bar jylla iakiba la ialam da u Paul Leong lem bad u khun lajong u Kimfa Leong(Marbaniang) . Ka jingnud jing ki barjylla ban shoh ban bom iaki Khasi ka pyni baki mynder ki la sdang ban leh trai khlieh hapoh ka Ri jong ngi.
Khatduh ka Seng ka kyntu jur iaki para Ri ban kyndit thiah noh bad sangeh noh shisyndon nakaba kdup nakaba ri bad nakaba pynsyaid ding ia u Bsein namar ynsa puh kylla iangi lada ngi ri shi ri ia u, lada ioh ka lad lei ki para ri ki ladei ban pyniap kloi kloi ia u seinpuh.. pynkut ka kyrwoh na u Publicity Secretary ka KSU Iooksi Unit.(SP News)
