Shillong,Naiwieng 19: U MP jong ka Lok Sabha na Tura u Conrad K. Sangma u ba long ruh u National People Party, u la ong ba kane ka jingpynkylla thymmai ia ka pisa ia ka lut T.500 bad T.1000 tyngka kumba la pynbna da u myntri rangbah duh jong ka Ri India u Narendra Modi kan don ka jingktah ia ka ioh ka kot ha ka ri hynrei kane kan long tang shipor.
Haba kren ha ki lad pathai khubor ha dien ba la dep ban jied ia u Dr WR Kharlukhi kum u president jong ka NPP Meghalaya state Unit u la ong ba kane ka jingpynkylla kynsan ia ka pisa, hooid kan ktah hynrei kan long shipor, ha kin por ban sa wan pat ki paidbah kin sa ioh ia ka jingmyntoi kaba khraw.
Ka jingthmu jong ka sorkar ban pynkylla kynsan ia ka pisa ka long ban lap ia ki pisa bam klop, ban khanglad ia ka jingiakhaii ia ki drugs, ban khanglad ia ka jingbei pisa sha kikam lehnoh, u la ong “ ka dei ka jingshisha ba ki paidbah ki ia kynduh bun ka jingeh ha kane ka ri, hynrei haba kat kane kam hap ban leh long kiba iai shah shipor na ka bynta ka jingbha”.
U ne u nongialam jong ka NPP u la ong ba tang ha kine ki khyndait sngi ka jingthep pisa jong ki paidbah sha ki bank ka long kaba bun bah bad da kane ka jingthep pisa ki paidbah ka sorkar ka ioh ia ka khajna bad kane kan long ka jingmyntoi ia ki paidbah, u la ong ba ha Garo Hills da ki phew klur ki paidbah ki thep pisa mynta sha ki Bank. Ki don kiba ym tang ia ka Bank mynta ki la plié account ha ki bank.
