Pynursla, Risaw 10: U Dr Donkupar Roy president jong ka seng United Democratic Party (UDP) ha ka jingkren ka jong u ha ka jingialang jong ka party kaba la long ha Pynursla mynta ka sngi u la ong ba ka daw jong ka jingrem jong ki seng riewlum ha u 2013 ka dei na ka jingiapra jong ki seng riewlum.
Haba phai sha ka Langkyrdem Constituency, ka dei ka constituency jong ki seng riewlum, hynrei na kadaw jong ka jingiapaid hapoh ka seng kala pynlong ia ka party ban shah rem ha ka seng Congres ba kan jop ha u snem 2009 bad kum juh ha ka snem 2013 ruh ka seng riewlum kala shah rem na ka daw jong ka jingiapaid.
Ban wanrah ia ka jingjop ha u snem 2018 na kane ka jaka don kam ia ka jingiatylli para seng riewlum, u kyntu ia ki dkhot jong ka seng ba kin ia trei shitom ban khot lang ia kiwei ki para seng riewlum ban wan sha ka UDP ban lah ban wan rah ia ka jingjop jong ka party na kane ka Pynursla Constituency.
Haba ia dei bad ka tiket jong ka party na kane ka jaka u Dr Donkupar Roy u la ong ba ka party kam tip shano kan leit hynrei, ai ba kito kiba kwah ban ia khun ia ka elelction ki dei ban trei shitom bad ynda la dei ka por kin sa ia peit namar ka party kan jied ia u briew ne ka briew ba lah ban jop ha ka election, ban poi sha ka thong don kam ia ka jingiatylli.
Haba phai sha ka seng Congress u Dr Donkupar u la ong “ba mynta ki don ar tylli ki Congress ka Congress jong u Dr Mukul Sangma, ka Congress jong u Bah Vincent H Pala, ngan tip kan don ne em ka congress jong u Bah Prestone” . Kumba ka long mynta ki paidbah kila phai khmat sha ka seng riewlum.
Ha kane ka sngi u Bah Khan Khong Dkhar vice president barim jong ka Congress mynta ka sngi u la pyniasoh ia lade bad ka seng UDP ha kaba la pdiang sngewbha da ka president ka Pynursla Circle ka kong Banalari Khongwar. Ha kane ka sngi kren ruh da u Dr Jemino Mawthoh, u Bah Kular Khongjirem bad kiwei kiwei dei ki nongkit kamj jong ka seng.
