Shillong, July 03: Ka kynhun shipai kaba kyrpang jong ki BSF kiba don ha Mahadev,jong South Garo Hills district ka jylla Meghalaya, kila ioh ban kem 13 ngut ki nong Bangladesh kat ba ki dang mut ban wan rung sha poh India, kine ki bala shah kem ki long, u Anjan Sarkar, ka Savita Sarkar, u Sujeet Sarkar ba dang hynniew snem ka rta, u Gopal Bhaumik,ka Shifali Bhaumik , u Pujan Bhaumik , u Athir Das , ka Nioji Das , u Bindu Lal , u Niranjan Mondal , u Dulal Sarkar , u Akash Sarkar , u Shabuddin Sarkar baroh ki dei na ka shnong Anandpur,jong ka Kalmakanda police station hapoh jong ka District,Netrakona, jong ka Ri Bangladesh.
Kaba la pynlong ngoh ia ki BSF ka long ba na ki 13 ngut kiba la kem khat ar ngut ki dei ki Hindu, kane kala pynlong ia ki BSF ba kin pyrkhat ba kane ka jingwan phet kine ki briew sha India ka dei na ka daw jong ka jingshah leh bein ha ka thi ka Ri kaba bun ki Muslim, kane ka de ka jingphet shnong jong ki Hindu kiba dei ki rit paid ha kathi ka Ri.
Na ka daw jong ka jingshah pyniap jong ki briew hapoh jong ka Ri Bangladesh ha nongbah Dhaka, na ka liang jong ki BSF kila pynjur ia ka jingpahara ha khappud namar ba ki shipai jong ka Bangladesh ruh kila kyndang ia ki katto katne ki bynta ha khappud bad ka Ri India bad ka don ka jingsuba ba kine ki lehnoh kiba la leh ia katei ka kam sniew ha Dhaka kilah ban wan rih tngen ha India, Meghalaya.
Haka jingtohkit kine ki Hindu kiba la shah kem kiba la wan rung sha India kila iathuh ba kala don ka jingshah lehbein jong ki hindu ha Bangladesh bad kine kila ong ba ki kwah ban leit sha Cooch Behar ban ia kynduh ia kiba ha iing ha sem ban sah bad ki.
U heh duh jong ki BSF u ba dei peit ia kane ka jylla Meghalaya P. K. Dubey, Inspector General Border Security Force u la ia kren bad u Director General ki pulit jong ka jylla Meghalaya khamtam eh haki bynta jong ka Garo Hills. Na ka liang jong ki BSF bad ki Pulit kin ia trei lang ban peitngor ia kino kino ki kam pyntrei kiba long pyrshah ia ka Ri. Ia kine kiba la ioh kem la aiti sha ki pulit ban leh ia kaba don kam.
