Mairang, Jylliew 18: Ka Khatsawphra College bad Higher Secondary School Mariang kala pynlong ia ka jingpynkup burom ia ki samla pule jong kane ka jaka pule kiba la pass bha ha ka Secondary School Leaving Certificate ia kaba la pynlong da ka Meghalaya Board of School Education mynta u snem 2017, ha ka liang pule Arts bad Commerce.
Ha ka jingkren jong u Arunkumar Kembhavi Deputy Commissioner jong ka West Khasi Hills District kum u kongsan ha kane ka sngi u la ai ka jingiaroh ia kane ka skul wat la ki dang shu sdang shen hynrei kila lah ban wan sha khmat ha ka jingpule ha kaba ki khynnah jong kane ka jaka pule kila pass bha, ha ka Commerce kila pass 100% bad ka Arts 96.30 %.
Ha kane ka sngi na ka liang jong u DC u la ong ba ia kaei kaba ka skul kan pan jingiarap yn sa leh shitom ban pynioh namar kaei kaba kane ka skul kala lah ban leh ka long kaba ym shym la lah ban mut dur wat la kane ka skul ka dang sdang tang ha u snem 2015 kala la ban kiew palat ia kaba ym shym la lah ban poi pyrkhat.
Ha kane ka sngi u la pynkup burom ia ki samla pule jong kane ka skul kiba la pass bha, ha ka jingiadon ryngkat u SDSEO u Bah SP Kurbah, ka SDO jong ka Mairang Civil Sub Division ka kong F M Lakiang ha kaba kila ai ia ki khusnam sha ki samla kiba la pass bha ia ka SSLC haka liang pule jong ka Arts bad Commerce.
Baroh ki khynnah kiba la shah pynkub burom ki long 30 ngut, saw ngut na ka Commerce stream bad 26 ngut na ka Arts stream. Ka skul kala phah saw ngut ban thoh ia ka exsam Commerce ha kaba baroh kila pass, kawei kala ioh ba nyngkong, ar ngut kila wan ba ar bad wei la wan balai.
Ha ka Arts pat la phah ban thoh ia ka exsam 27 ngut, ha kaba kila pass 26 ngut, lai ngut kila long ba nyngkong, 12 ngut ha ka kyrdan ba ar bad 11 ngut ha ka kyrdan balai. Ha kane ka sngi la sam ruh ia ka khusnam “Kitdor Memorial Award” bad kiba la ioh ia kane ka khusnam ki long ka samla Badariti L Nongrang Art bad ka Baphilahun Marwein Commerce ha kaba la sam da ka kong Ebel War kurim jong u Bah Kitdor Syiem bam kwai ha dwar u blei. Ka jingai ia kane ka khusnam ka long ban pynsah kynmaw ia u tei u rangbah u ba la long u Nongseng ia kane ka Khatsawphra Sport Association.
Ha kane ka sngi u Bah Boldness L Nongum principal jong kane ka College, u la pynbna ruh ban plie noh ia ka Degree Course, ha ka Arts bad Commerce stream ha kaba ki bor jong ka NEHU kin sa leit ban plie ha ka 30 tarik mynta u bnai.
Ka jingialang la pyniaid da u president jong ka college u Bah Balawan War, ia ka jingkren ai khublei la ai da ka Vice Principal ka kong Aida C War, kiwei ki riew rangbah kiba la ia don lang ha kane ka sngi ki long u Bah AS Kharmawlong,u Myntri ka Hima Nongkhlaw u Bah Lawrence Basaiawmoit, ki Sordar shnong bad ki dkhot jong ka Governing Body jong kane ka College.
