Shillong, Lber 05: Haba ia dei bad ka jingpyndon kam ban pyniasoh ia u Aadhaar bad ka kard Ration haduh mynta kam pat long kaba hap ban pyniasoh, hynrei ka dang dei tang ka jingaijingmut kane ka long katkum ka kyndon kaba hynriew jong ka Aadhaar Act.
Katkum ki lad khubor kiba dei na ka tnad sam bam jong ka jylla la ong ba la bthah ia baroh ki Deputy Commissioner jong ka jylla ban bthah lem sha baroh ki nongsam khaw ration ban bthah ia kiba ioh khaw ration ba kin ia ka Aadhaar kard.
Ka tnad sambam jong ka sorkar pdeng haduh mynta kam pat pynbna ba ong ba hap ban pyniasoh ia u Aadhaar bad ka kard Ration, hynrei la ai jingmut ba kan bha lada pyniasoh ia u Aadhaar bad ka kard ration namar ba mynta yn pyndon kamnoh ia ka mashin POS ha ki dukan ration.
Kumba ka long mynta na ka liang jong ka sorkar Meghalaya kala dang iaid sha khmat ban pyntrei kam ia ka rai jong ka sorkar pdeng ban don kawei ka ri kawei ka kard ration bad ia ki kor POS la sdang pyntrei kam mynta ha ki dukan ration.
La sngewthuh namar ba ka jylla Meghalaya ka dang don bun ki shnong kiba ym pat ioh ia ka internet, hynrei ia ki kor POS la shna ha kata ka rukom ba lada don ne ym don internet ka POS kan trei kam bad ynda ki ba ai khawration ki poi ha ki jaka ba don Internet ka kor POS kan kyntiew hi sha ka syerber jong ka tnad sam bam ka sorkar pdeng.
