Shillong, Rymphang 21: U Bah Teinwell Dkhar nongialam ka Parliamentary Party jong ka UDP hapoh KHADC mynta ka miet u la pyntip ba ia ka motion bym don jingshaniah shuh ia ka Executive Committee kaba la wan rah da u Bah Shylla mynta ka sngi hapoh iing dorbar ka dei ka kam jong u Bah HS Shylla Marwei ym jong ka party UDP.
Haba pyntip sha u SP News Agency lyngba ka phone mynta ka miet u Bah Teinwell u la ong ba ha ka jingialang jong ka PP ha ka 20 tarik mynta u bnai kim shym la ia mynjur ban wanrah ia ka motion bym don jingshaniah shuh ia ka EC jong u Bah PN Syiem ha kaba baroh hynriew ngut ki MDC kila ia don lang bad ka party kala khang pyrshah ban wanrah ia kane ka motion.
Ha ka por miet pat kala don ka jingiakynduh lang , ha kaba u Bah HS Shylla u la ong ba wanrah ia ka motion bymdon jingshaniah shuh ia ka EC jong u Bah PN Syiem, hynrei na ka liang jong ka party kala ong ba ia mynta kim don kum kata ka jingthmu namar baki dang ia don lang hapoh jong ka EC kaba dei ka PDF.
Na ka liang jong u Bah Teinwell u la ong “ ba nga kum u nongialam jong ka PP ngan hap ban pyntip mynta ka miet sha ki nongialam jong ka party halor kane ka jingle jong u Bah HS Shylla ba u la wan rah ia ka motion bym don jingshaniah shuh pyrshah ia ka EC bad kum ka party ka dei ban leh ei ei halor kane” la ong u Bah Teinwell.
