Shillong, Jymmang 04: Ka tnad ba dei peit ia ka khaii pateng jong ka khasi Hill Autonomuos district Council mynta ka sngi ka la pynlong biang ia jingleit khynra ia ki ia ki dukan jong ki bar jylla ha Umsohsun bad kaba la pynkyndit ia ki briew jong ka KHADC ka long ba bun na kiba shong dukan ki pynia ia ka licensee khaii kaba ki la ioh na ka Shillong Municipal
Na ka liang jong ka KHADC ia kine ki dukan kiba la pyni ia ka license kaba ki la ioh na ka Municipal ka la khang tala noh. U Bah L Khangkongor u la ong ba na ka liang jong ka ophis kala dei ong ia ki ba ki dei ban shim ia ka Trading Licnese hynrei ki ia leh pyrshah kumta na ka liang jong ka ophis kam banse ban leh ia kaba don kam katkum ka ain kaba la pynkubor.
Haba ia dei bad ka Municipal u Bah Kharkongor u la ong ba kam don hok ban ai license ia kine ki briew kiba shong dukan ha kito ki jaka namar ka dang hap hapoh u pud u sam jong ka KHADC, lada ka municipal ka kwah ban ai license ka lah ban ai ha jaka jong ka kiba hap hapoh European Wards.
U bah Kharkongor u la ong biang kane ka tnad ka dang iai bteng ia ka jingleit khynra sha ki wei ki ei ruh ki jaka kiba hap hapoh u pud u sam jong ka District Council. La ong ba naduh ba la sdang ia kane ka jingkhynra ka ophis kala khang khyrdep 42 tylli ki dukan naduh mynta ka sngi.
Katkum ki jingkhein kiba don hapoh ophis ki dukan ha Iewduh kiba la ioh ia ka trading license na ka KHADC ki don haduh 980 tylli bad ia kine kiba la dep ai ruh ka Ophis kan dang bishar bniah shuwa ban pynthymmai biang ia ki ka shong ha ka jinglah jong ki ban pynbiang ia ki kot ki sla.(SP News)
