Shillong, Lber 27: Ka National People Party (NPP) mynta kala don 11 ngut ki MDC ha ka iing dorbar jong ka KHADC, Pyniaid Syiem, Gigur Myrthong, Rangkynsai Kharbuki, Victor Ranee, Alvin K Sawkmie, Teiborlang Pathaw, Grace Mary Kharpuri, Macdalyn S Mawlong, Lamphrang Blah, Mitchel Wankhar, Fantin Jospeh Lakadong.
Ha ka ilekshon ha u snem 2019 ka NPP kala jop hynriew ngut, hynrei u bah Pynshngianlang Syiem u la mih noh na ka party bad leit ban pyniasoh bad ka party Congress bad kane ka jingmih noh jong u ka pynlong ia ka party ba kan don sa san ngut.
Hynrei mynta da ka jingleit pyniasoh Teiborlang Pathaw, Grace Mary Kharpuri, Macdalyn S Mawlong, Lamphrang Blah, Mitchel Wankhar, Fantin Jospeh Lakadong kala pynlong ia kane ka party ba kan kiew biang sha ka jingdon ki MDC 11 ngut hapoh ka iing dorbar.
Ki thymmei khubor ki iathuh ba kin dang don shuh ki MDC ki ban leit ban pyniasoh bad ka party NPP ha KHADC, wat la ki bun ki MDC ka party NPP kan ai ka jingkyrshan ia ka UDP ban ialam ia ka EC kumba la ia kut.
