Shillong, Jylliew 16: U Secretary jong ka NCP ba dei peit ia ka dong shatei lam mih ngi jong ka Ri India u Narendra Verma u la ong ba ka seng BJP kan pyniakhun palat ia ka 40 tylli ki seat ha ka MLA Election jong u snem 2018 ha kane ka jylla Meghalaya kaban long ha u snem 2018.
Haba kren ha ki lad pathai khubor mynta ka sngi ha Shillong Press Club u la ong ba ka seng kan nym don kano kano ka jingiateh lok bad kiwei ki seng sain pyrthei hynrei kan ia khun beit marwei. Na ka liang jong ka seng mynta kala pynliet jingmut sha kane ka jylla ba kan party kan jop bun ki Konstitwensi.
La iathuh ruh ba u National President jong ka seng u Sharad Pawar un sa wan sha kane ka jylla ha ka taiew baar jong u Naitung ban ia shim bynta ha ka jingialang jong ka seng, hynrei ia ka jaka ym pat ong la kan long ha Tura na ha Shillong.
Wat la ka seng NCP kala ai ka jingkyrshan ia ka sorkar Congress ha kane ka jylla, hynrei u tei u nongialam jong ka seng NCP, u Verma u la kynthoh ba kane ka sorkar congress ha kane ka jylla Meghalaya kam shym la lah ban leh ei ei ha kaba ia dei bad ki kam pynroi kaba ki paidbah ki don kam, ka jingkyrshan jong ki ia ka sorkar Congress ka long ban pynlait ia ka jylla na ka election shiteng samoi.
Ha kane ka sngi na ka liang jong u Verma u la iathuh ba u Saleng A Sangma Independent MLA na Gambegre Garo Hills u la long u Associate member jong ka seng NCP bad kane ka kren shai kdar ba ka NCP kan dang kiew ha kane ka jylla. La ong ruh ba u bah Sanbor Shulai u dei u president jong ka NCP ha Meghalaya.
