Shillong, Risaw 16: U MLA jong ka Songsak u ba dei na ka NPP u Nihim D Shira ha ka jingialang paidbah kaba la long ha Jowai u la ong ba ka party ka long kaba la khreh ban pynrem ia u Dr Mukul Sangma ha kane ka Election MLA ka ban long ha u snem 2018 na Songsak Constituency.
Ha kane ka jingialang paidbah, u Nihim u la ong ba u pdiang sngewbha ia u Dr Mukul Sangma ba yn wan ban ia leh na Songsak bad u la ong ba ka party kan pynthikna ban pynrem ia u. Ha ka juh ka por u la ong ba ka seng NPP mynta kala dang kiew ha Garo Hills bad kum ka party ka don ka jingkyrmen ban jop palat ia ka 15 tylli ki Constituency.
Ha kane ka jingialang paidbah na ka liang jong u president jong ka NPP Meghalaya state Unit, u Dr W R KHarlukhi u la pdiang sngewbha ia u Bah Wailad Shylla u ban long u kyrtong jong ka party NPP na Jowai Constituency, ia u Bah Gilbert Sten u ban ia khun na Mokaiaw constituency.
Ha kane ka jingialang paidbah kaba la long ha ka sngi saitjian ha Jowai na ka liang jong ka party NPP ka kyntu ia baroh ki dkhot ba kin ia trei shitom na ka bynta ban pynpoi sha ka thong ia ka party ban ioh ia ka bor synshar ha ka jylla. Na ka liang jong ka NPP kala kynnoh ba ka seng Congress kala kular bun kiei kiei sha ki paidbah hynrei kam shym la lah ban pynrulong.
