Shillong, Lber 22: Ka party NPP kaba dei ka party kaba ia treilang bad ka UDP ha KHADC mynta ka peit kliaw ia ka jingia pyninia hapoh ka party UDP ha kaba ia dei bad ka kam Chief Executive Member hapoh ka District Council.
Kumba ka long mynta ka party NPP ka don ia ka jingbun paid hapoh jong ka KHADC bad kam kwah ban pynthud ia ka jingiatreilang ha ka Executive Committee kum ba la ia kular naduh bala sdang ha u 2019, kane la long katkum ki thymmei khubor kiba ia jan bad ka party NPP.
Hynrei kane ka jingia pyninia kaba mih ha kine ki sngi hapdeng ki MDC jong ka party UDP ha ba ia dei bad ka kam CEM ha KHADC, na ka liang jong ka NPP ka peit kliaw ia kane ka jinglong jingman ha ka sain pyrthei hapoh kane ka District Council.
Ia mynta ka NPP ka bat ia u lakam synshar ha ki ar tylli ki District Council ha JHADC bad GHADC bad ha KHADC ka ia treilang bad ka UDP bad kane ka long naduh ba sdang ha kaba u bah Teinwell Dkhar u la shimti nyngkong kum u CEM na ka UDP bud sa u bah Titosstarwell Chyne kum u CEM.
