Shillong, Rymphang 23: Haka jingialang kaba la long san sngi lynter hapoh Dhaka ka nongbah jong ka Ri Bangladesh, na ka liang jong u Director Genenral jong ki BSF u KK Sharma u la ong ia ki Border Guard of Bangladesh BGB ba ka pisa thok ka wan na Bangladesh sha India.
Ha kane ka jingiakynduh na ka liang jong u heh ki BSF u la ong ba ki lah ban pynshisha ruh ia kane ka jingkam jong ki, la ong ba haduh mynta ki lehnoh na kane ka dong shatei lam mih ngi jong ka Ri India ki dang don ha Bangladesh, ha kane ka jingialang la ia kren ruh halor ki kam khaii tuh na kane ka Ri sha Bangladesh bad na Bangladesh sha India.
Ha kane ka jingialang na ka liang jong ki shipai BGB ruh kila ong ba ki paidbah jong ka Ri India kila sait iap ia bun ki nong Bangladesh ha khappud bad ka jingiakhaii tuh ha kaba ki BGB ki kwah ba ia kane dei ban khanglad shisyndon, hynrei na ki BSF ki la ong ba ka jingsiat ka dei ban ia da ia lade namar ka jur palat ka jingwan tuh.
Haba ia dei bad ka jingker ksainar shiah mynta kan long noh tang shisyrtap ha khappud na ka bynta ban khanglad ia ka jingiarung iamih jongki briew na kane ka Ri bad kumjuh na ka Bangladesh na ka liang jong ki BGB kila ai ka jingkular ba kin ia trei lang ha kane ka bynta ban peit ba kane ka kam kan long kaba iaid beit khamtam eh ka East Khasi Hills bad West Jaintia Hills.
Ha kane ka jingialang ha ka kyrdan jong ki DG ia kaba la tip kum ka DG level border conference hapdeng ki BSF bad ki BGB ia kane ka kynhuh kaba 18 ngut la ialam da u K K Sharma, IPS, Director General BSF, bad na ka liang jong ka BGB la ialam Major General Abul Hossain ndc, psc bad 28 ngut ki heh shipai jong ka Bangladesh.
