SHILLONG, Jylliew 16 : Ka Nirmali Society of Christ Jesus, kaba ju tip kum ki Nirmali Sister, Mawkasiang Centre ka la pynlong ia ka jingsam ia ki syrnod ne ki certificate sha ki khynnah kiba la pyndep ia ki jinghikai suhjain ha ka centre jong ki ha Mawkasiang. Haba kren kum u kongsan ha kane ka sngi, U Bah A. Nongkynrih, programme Associate/ERP EFC Shella Bhoalganj C & RD Block, Sohra u la iaroh shibun ia kane ka jaka ai jinghikai kaba la don mynta la 5 snem. U la ong ruh ba kane ka jinghikai kaba ki ioh ka long kum ka jingkhang kaba plie lad ia ki ba kin kham pynbtit shuh ia ki sap ki phong ba ki don wat la ka jinghikai ka long kaba lyngkot.
U la bynrap ruh ba lyngba kane ka jinghikai ki khynnah jong ngi kin ioh ki lad ba kin kham pynbha shuh shuh ia ka jingtip jong ki ha kiwei pat ki jaka ai jinghikai kiba heh kiba don ruh ka jingsiew. U la kyntu ia ki khynnah shynrang bad kynthei ba kane ka por kam dei shuh ka por ban ap na ka jinglehisynei jong no jong no hynrei ki dei ban wad ki lad ki lynti ki ban long kita ki nongkyrshan lem ia ka iing ka sem bad noh synniang sha ka imlang sah lang da ka nuksa babha jong ki jong ka jingtrei shitom sha kiwei pat.
Kiba kren ha kane kynthup ia ka Sr. Sheela Warbah bad u Bah Wallamjop Kharbihkhiew ba dei ki nonghikai jong kane ka centre. Kiba donlang ha kane sngi kynthup ia ka Sr. Caroline Synnah, Centre Coordinator, Sr.Victoria Shati, Bah Ginus Kharumnuid, Nonghikai bad ka Kong Ilene Paila, programme Coordinator, Social Service Centre, Archbishop’s House, Shillong. La don kumba 30 ngut ki khynnah kiba ioh pdiang ia ki syrnod.
La pyniphuh iphieng ia kane ka sngi da ka jingrwai bad ka drama lyngkot na ki khynnah kiba la pyndep ia ka jinghikai. La ioh ruh ka jingkren na ki khynnah kiba la dep ia ka training bad kumjuh ruh na kito ki khynnah kiba la don bad ki company kiba heh shabar jylla kumba shisnem ei ei bad mynta pat ki wan shuti.
