Shillong, Rymphang 21: Ka Langrin Youth Welfare Association (LYWA) ryngkat bad ki paidbah nongshong shnong jong ka thain ba don u marpoh khyndew Uranium ki pynpaw ia ka jingbitar halor ka jingpaw pyrthei ba kynsan ba u bah Hispreaching S. Shylla lem bad ka Executive Committe jong ka KHADC ha u snem 2006 ka la dep soi ia ka soskular lane ka Memorandum of Understanding (MOU) bad ka UCIL ha utei u snem ban shah noh ban khlong ia u Uranium na ka thain Mawthabah bad Kylleng Pyndensohiong.
Kane ka jingleh ka jong u kaba long kaba sop sop bad ba lyndet ka pynlong kumba iuh tdong bsein ia ka LYWA lem bad ki paidbah namar tad haduh kane ka khyllipmat u HS Shylla u la ieng nongrim ba u ai NOC tang ban shna ia ka surok bad ym ban tih ia u Uranium.
Hynrei donbok ba na ka liang ka kur ki ioh khubor noh halor kine ki jingthmu basniew ki jong u kaba pynlong ia ki ban ieng rangbah ban pynpulom ia kine ki buit sianti ki jong u tad haduh ba ki la pynpra syndon ia u mawnongrim jong katei ka surok ha ka por kaba u HS Shylla u dang thmu ban plie paidbah noh ia utei u mawnongrim. Shuh Shuh ka seng ka buh jyngkylli ruh ia une u riewrangbah ba shaei kata ka 36 klur ba ka KHADC ka la mang ia kato ka surok ha katei ka por ka jah?
Ka seng ka pynrem jur ruh ia u bah Dios Jyndiang, MLA ka Nongstoin halor ka jingkyrshan ka jong u ia ka surok two lane jong ka Nongstoin – Wahkaji – Ranikor. Kumba la paw tyngkrein lyngba ki kot ki sla ka tnad Ministry of Road & Transport Highways ba ka jingthmu ban tei ia katei ka surok kam don jingiadei eiei na ka bynta ka suk ka sain u paid nongshong shnong katei ka thain hynrei ka dei beit thik ban pynsuk bad prat lynti ia ka jingtih ia u Uranium.
Ka seng ka kylli ba kumno kat u nongmih khmat ruh um peiphang halor ki jingthmu ba sniew lyngba ka jingshna ia katei ka surok hynrei u shu kyrshan beit ia ka khlem da peit ne thew sani pat ia kaei ka ban jia hadien. Shuh shuh ka seng ka buh dak jingkylli ruh ia u bah Diostar Jyndiang ba balei um bud ia ki dienjat jong u maieid Hopingstone Lyngdoh (bam kwai ha dwar u Blei), uba ieng beit ha ka nongrim kaba skhem ban ym ailad ban khlong ia une u marpoh khyndew tad haduh ki sngi ba khatduh ki jong u da kaba pynpaw ia ka jingpyrshah halor ka jingthmu ban tih ia u Uranium lyngba katei ka surok 2 lane.
kyntang iawai ka LYWA lem bad ki paidbah ka thain ki pynpaw ba kin ym lah da leilei ruh em ban shaniah ia u HS Shylla lano lano ruh namar une u dei u briew u bym don jingkitkhlieh ia ka Jaidbynriew hynrei u dei u jingthaw u ba pyrkhat tang ia ka jingmyntoi jong u bad ki katto katne. La kynnoh ka LYWA katkum ka kyrwoh kaba la phah mynta ka sngi ia kaba la sign da u bah BS Lyngdoh president ka seng.
