Shillong, Iaiong 26: U President ka seng United Hynniewtrep Movement (UHM) u Bah Charli Rani u la ong ba mynta ka sngi kila leit ban ia kynduh ia u Symbut Myntri Rangbah ka jylla u bah Prestone Tynsong ban dawa na ka sorkar ban ai ia ka jingregister ei ia ki jaka sha khappud.
Ha kane ka jingiakynduh bad u bah Prestone ka seng kala sngewthuh shai ha kaba ia dei bad u pud u sam ia kaba ka seng kala dawa naduh u 2018 la pynshai sha ki ba baroh ka shnong hapoh jong ka District Council, namar ka dei ka khyndew bad ka khlaw ha don hapoh jong ka khyrngit kaba hynriew jong ka Riti Synshar jong ka Ri India naduh ba la pynlongdoh long snam ia ka Sixth Schedule.
La iathuh ba hapoh kane ka khyrngit kaba hynriew mynta ki dang wan rah ia ka Land Bill bad kila dep ban shong ia ka standing Committee mynta u bnai bad la dei ban pynbor ia ka District ban pynkloi noh wut wut namar hangto la pynrung ia ki bynta kiba ka seng ka daw ban ai register ei ia ki haka ha khappud bad ka Assam.
Haba ia dei bad kane ka kam na ka liang jong u Symbut Myntri Rangbah ka jylla u bah Prestone Tynsong u la ong ba lada lah ban ong ia ka District Council ba kin shong noh ia ka dorbar ba kyrpang ban pdiang ia ka Land Bill ha kaba kila lah ban leh tang hapoh shi sngi ruh hapoh jong ka KHADC.
La ong ba lada la lah ban pdiang ia kane kala suk ba kiwei ki District Council ha ka jylla kin shi shim ia ka jong ka KHADC bad kaba sah kaba long mynta ka seng kan leit sha KHADC ban ia kynduh ia kane ban ia kren.
Ha kane ka jingiakynduh ka seng kala ia kren ban dawa ia ki police out post sha ki khappud bad ka jylla Assam khamtam eh ha kito ki jaka ba ka jingiakynad kum kato ka jingjia ha Saba Mukroh haba ia dei bad kane u synbut myntri rangbah ka jylla u la kular ban khot ia u mytnri kam poh iing ban ia kren ia kane.
Haba ia dei bad ka jingshah shoh ki dkhot ka seng ha Saba Mukroh ba ka seng kala shim khia bad kala ia kren bad ka sorkar ba kan leh tyngeh, haba ia dei bad kane ka sorkar kala phah ia u DC ban wat jingtip bad mynta ki dang ap ia ka kaiphot na u DC jong ka West Jiantia Hills.
Ha kane ka jingiakynduh ka seng kala dawa na ka sorkar ba ka dei ban iarap ia kiba mynsaw bad ban pynioh biang ia ki tiar kiba la jah, na ka liang jong ka seng ka phah ia ka khubor sha ki karbai ba ki dei ban pan map ia kaei kaba ki la leh ia ki dkhot ka UHM hapoh shitaiew lem kumta ka seng ruh kam nym burom shuh ia ki karbi.
Na ka liang jong ka seng kan phah ruh ia ka jingujor sha ka sorkar khamtam sha u myntri kam poh iing bad ban phah da ka jingthoh sha ka Meghalaya Human Commission halor katei ka jingjia pyrshah ia ki briew jong ka seng.
